PAGKAMALISYOSO ra gyud sa mga tawo. Nakakita lang nga absent si Presidente Rodrigo Duterte sa press conference kabahin ni super typhoon Rolly sa miaging Dominggo, mangintriga dayon sa social media nga “saan si Presidente?” Naa ra iyang balay sa Syudad sa Davao oi, matod pa ni presidential spokesperson Harry Roque. (Take note. Mas appropriate man kuno nga tawgon si Roque nga spokesperson. Ambot kaha kon ngano.)
Unsaon man sab gyud nga sukwahi sa una, wa may gipakita nga hulagway nga nagkaon si Digong ug naay asawa nga magpakita og newspaper. O bisan taped message na lang.
Si spokesperson Harry Roque ra sab ang namahayag nga naa si Digong sa Davao nag-monitor sa panghitabo sa bagyo. Ug Martes, buot ipasabot, karong adlawa pa siya naa sa Malakanyang. Di ba mas katuohan si Sen. Bong Go, ang inilang alalay sa Presidente, kay sa ni Roque? Pero hilom kaayo si Senador. Tungod niini, nisiaw gyud hinuon ang hashtag #nasaanangpangulo sa Twitter, Facebook ug Messenger. Natulog si Digong, maoy intriga sa mga netizen kay wa man gyuy EEEK ang Presidente bisan pa man sa emergency sa Luzon.
Magpaabot na lang kita karong adlawa. Basin dunay mogimaw nga pre-taped video message.
LENI
In fairness hinuon, naka-meeting ug gi-televise live ang Cabinet. Apan nganong mga lima ka oras human nag-landfall? Makahinumdom lang ko sa mga Duterte followers (apil na ko ana) nga grabing nakasaway kang kanhi Presidente Aquino ug sa iyang bata-bata nga si Mar Roxas. Naghimo baya og live nga mensahe si PNoy sa wala pa mo-landfall ang super typhoon nga si Yolanda ug niadto mismo sa Syudad sa Tacloban si Roxas.
Sige na lang. Ug atong hisgutan nga dali kaayong nakapanghatag og hinabang ang opisina ni Vice President Leni Robredo. Wa matulog ang Bise Presidente. Kay gamay kaayog budget ang iyang opisina, nagsalig kini sa mga donasyon. Bisan pa man, nakasugod na sa pag-apod-apod og hinabang sa wala pa mohapak ang bagyo. Ang Presidente, bisan sa late na nga mga press conference, absent pa gyud. (@anol_cebu sa Twitter)