GIBALHOG na sa Sasa Police Station ubos sa Davao City Police Office ang giingong suspek sa pagpatay sa usa ka empleyado.
Sa post sa Sasa police sa ilang Facebook account, gipahibalo nila nga ilaha nang nasikop ang suspek uban sa laing tulo pa ka mga lalaki kinsa giingong mibabag sa mga pulis sa pagdakop sa suspek.
Ang operasyon gihimo sa hiniusang puwersa sa Regional Special Operations Group gipangunahan ni Police Major Reny Valdesco, City Intelligence Unit gipangunahan ni P/Lieutenant Colonel Noel Asumen, City Mobile Force Company gipangunahan ni Police Major Florentino Retes ug City Special Operations Group ug sa mga personahe sa Sasa Police Station nga gipangulohan ni Police Major Milan Naz.
Nasayran nga positibong gikumpirma sa testigo ang suspek nga nadakpan sa Barangay Miranda, Babak, Island Garden City of Samal (Igacos) sa pagpatay sa usa ka empleyado niadtong Oktubre 30 sa gabii nga nahitabo sa Old Airport Road, Sasa ning dakbayan.
Sa kasamtangan, gibalhog na ang mga suspetsado sa Sasa Police Station samtang gina-asikaso pa ang mga kaso batok kanila.