NAHATAGAN og gamayng kahayag ang pangandoy ni Filipino World Boxing Organization ( WBO) bantamweight champion Johnriel Casimero nga makaaway ni undefeated ug Japanese sensational nga si Naoya Inoue, alang sa usa ka unification fight.
Si Inoue kinsa maoy naghupot karon sa World Boxing Association (WBA) ug International Boxing Federation (IBF) titles, mipaundang sa Australian challenger nga si Jason Moloney sa ikapito ka round niadtong Dominggo didto sa Las Vegas.
Sa interview ni Bob Arum, chief executive officer (CEO) sa Top Rank Promotions, gibutyag sa beteranong promoter nga hayag ang posibilidad nga mahinayon na ang Inoue-Casimero fight sa sayong bahin sa sunod tuig - butang nga ikalipay na unta ni Casimero.
Matod ni Arum nga posibling mahitabo kini sa bulan sa Pebrero o Marso. Ingon niya nga moaway ang sikat nga Japanese fighter sa Pebrero o Marso ug ilang gikonsiderar si Casimero nga maoy makontra niini.
Pero mura man og gitara nga nagkayabag ang intonada sa kampo ni Inoue. Wa magkatukma ang ilang pamahayag.
Kinit tungod kay sa lahing interview, si Inoue mipadayag man tuod nga ang pag-unify sa mga bantamweight titles maoy sunod niyang target, pero dili ang WBO title ni Casimero maoy ilang unahon.
Gipasabot ni Inoue nga ang WBC title maoy ilang sunod nga target ug dili pa ang WBO nga bakus ni Casimero.
Karong Disyembre 12, ang laing Pinoy fighter nga si Nonito Donaire mosuway og langkat sa WBC title nga gihuptan ni Nordine Oubaali.
Sa ato pa, kon kinsa ang modaog niini maoy gusto niyang ikasangka.
“If I had to choose one, it would be the winner of Oubaali and Donaire. It has always meant a lot to me. I would love to face Casimero as well for his WBO title but I would first prefer to fight for the prestigious WBC title,” matod ni Inoue (20-0, 17 KOs) sa interview sa BoxingScene.com.
Kon tinuod nga sa Pebrero o Marso moaway si Inoue, imposible kining mahitabo, tungod sa kahamubo sa panahon.
Mosugot kaha ang kampo ni Donaire o Oubaali nga mogintang lang og tulo ka buwan gikan sa ilang away unya mosakbang dayon sila ni Inoue?
Nganong magdali man sab tuod sila?
Kon dunay haom nga angay awayon si Inoue niining mga buwana, way lain kon dili si Casimero (30-4, 21 KOs) kay gawas nga pulos sila dunay titulo, sakto sab sila sa pahuway.
Niadtong Abril ning tuiga, gikatakda na unta nga magsangka si Inoue ug Casimero didto sa Las Vegas.
Apan wala kini mahinayon tungod sa pagkatap sa coronavirus.
Giuswag unta kini ngadto sa buwan sa Agusto o Septiyembre apan sa rason nga bugtong ang kampo lang ni Inoue ang nasayod, sa kalit lang nahanaw ang maong plano ug wala na mahisguti - butang nga nakapasagmuyo ni Casimero.
Niadtong higayuna, wa ko motuo sa mga pagduda nga nahadlok si Inoue ni Casimero kay taas akong respeto sa dekalidad nga mga Japanese fighters sama kang Inoue. Isog ug dili mamili og kontra.
Pero sa gipakita sa 27 anyos nga Inoue, mura’g makatuo na gyud ko nga mikakak ug nahadlok ni Casimero ang boxing star sa Japan nga gihulagway ni Arum nga mora kuno og si Manny Pacquiao moaway.
Tungod sa iyang kabangis ibabaw sa ring diin 17 sa 20 niya ka mga kontra iyang gipang-knockout gitawag siya og Monster, pero kon mopadayon siyang motalidhay sa hagit ni Casimero, ambot og angayan ba siya niining anggaa. (jun.migallen22@gmail.com)