GATUSAN ka mga sakong bugas humay, tubig mainom, ug ubang pagkaon nga mobalor tanan og P1.3 milyunes nga natigom sa Police Regional Office (PRO) 7 ang gipadala na sa Bicol region.
Gisakay kini sa BRP Pangasinan PS31 sa Philippine Navy sa Miyerkules, Nobiyembre 4, alang sa mga residente nga labihan nga naapektohan sa bagyong Rolly.
Ang mga hinabang naglangkob kini sa 500 ka sakong bugas humay sa tag 25 kilos nga gihatag sa Cristina Lee Dino Foundation pinaagi sa Office of the Presidential Assistant to the Visayas, gatusan ka galon sa tubig mainom lakip na ang usa usab ka gatos ka butane ug ubang kagamitan sa panimay.
Matod ni Police Brigadier General Albert Ignatius Ferro, direktor sa PRO 7, nga kini alang sa mga dapit nga grabehan ang danyos sama sa Catanduanes, Guinubatan, Pulangue, pipila ka bahin sa Camarines Sur ug Masbate.
Nagpadala usab og mga sinakong bugas lakip na sa mga sapot ug mga delata ang buhatan ni Senator Bong Go ug Senator Ronald Bato dela Rosa.
Mipasalig si Secretary Dino kang Ferro nga motabang sila sa gihimong relief operations sa PRO 7.
Si Ferro lumad nga taga Bicol nahingawa usab sa mga apektadong residente nga angayang abagan.
Gipahibawo usab ni Ferro nga gipaestambay lang una ang usa ka gatus ka mga sakop sa Crisis Response Battalion nga ipadala sa Bicol region alang sa search and clearing operation tungod kay gimandoan siya ni PNP Chief General Camilo Cascolan nga tutukan lang una kaniya ang relief operation.
LAPU-LAPU
Nagbutang og drop box ang kagamhanan sa dakbayan sa Lapu-Lapu sa lobby sa ilang City Hall alang sa mga Oponganon nga modonar sa Bicol nga grabeng naigo ni Rolly.
Mao kini ang gipahibawo ni Lapu-Lapu City Mayor Junard Chan.
Gibutyag sa mayor nga mga ginamit nga sanina o ba kaha kabtangan mahimo nga ihulog sa drop boxLunes hangtod sa Biyernes, 8 a.m.-5 p.m.
Mahimo ra usab nga motawag sa buhatan sa Mayor alang sa dugang impormasyon.
Si Chan mipadayag nga dili lalim ang naagian sa mga kaigsuonang Bicolano gumikan sa sa bagyo.
Gawas nga liboan ang nawad-an og panimalay, adunay mga nakalas gumikan sa bagyo.
CEBU CITY
Samtang, ang konseho sa Cebu City nipasar atol sa sesyon Miyerkules, Nobiyembre 4, nga modonar og P5 milyunes sa Catanduanes.
Nauyonan nga cash ang ilang donasyon imbes pagkaon subay sa unang nasabotan. (AYB, HBL, GCM, PAC)