DILI una tugtan sa lokal nga panggamhanan sa Kidapawan City ang operasyon sa mga sabungan.
Kini human nasuta nga dunay kakuwangan sa mga gihikyad nga sumbanan sa mga operator subay sa gitakda sa Department of Interior and Local Government (DILG) sa mga sabungan sa siyudad hinungdan nga di pa kini makalusad og sabong.
Nagpahigayon una og ocular inspection ang City Covid-19 Compliance and Monitoring team sa mga sabungan.
Daghan ang nakita nga kakulang sa mga sabungan sama sa kalisud masunod ang physical distancing, kinahanglan nga limitado ang mosulod sa sambungan, kulang sab ang closed circuit television (CCTV) camera, walay thermal scanner ug uban pa.
Kahinumdoman nga gitugtan na sa National IATF ang pagpahigayon sa sabong sa mga dapit nga anaa sa Modified General Community Quarantine (MGCQ) apan kinahanglan nga mosunod ang mga operator sa mga sabungan sa gilatid nga sumbanan sa DILG.
Gitahasan sa National IATF ang LGUs nga seguradohon nga sundon ang mga guidelines sa DILG bag-o tugtan ang operasyon sa sabungan.
Tulo lamang ka tawo ang gitugtan sulod sa ruyda, walo gawas sa ring, gidili sab ang pagsinggit-singgit, magsuot og face mask, face shield, dili makasulod ang mga nakainom, gidili ang live streaming o kaha paggamit sa cellphone ug uban pa.
Wala pay licensed cocpit ang ipagawas LGUs alang sa sabong.
Magpatuman og "One Strike" policy ang LGU sa mga sabungan nga madakpan nga misupak sa guidelines ug isirado gilayon kini. (Edgar E. Fuerzas)