Giimbestigar sa pulis ang driver sa usa ka bus nga nadisgrasya.
Pulis: “Nganong nagpakusog ka’g dagan?” Driver: “Nipabulhot ko, Sir, kay nahadlok kong magukdan sa disgrasya.” Pulis: “Nadisgrasya man lagi ka?” Driver: “Sus, nag-una man diay ang disgrasya, Sir, naabtan nuon nako.”
Lahi ang hinungdan nganong kusog mopadagan ang mga driver sa mga Ceres bus nga ning bag-o lang nahilambigit sa sunodsunod nga mga disgrasya sa mga syudad sa Sugbo ug Mandaue nga mikalas na sa pipila ka mga kinabuhi.
Gipatuman diay sa Vallacar Transit Inc. (VTI), ang operator sa Ceres bus, ang quota system diin ang mga driver gihatagan og gidaghanon sa rota sud sa 16 oras sa ilang pagbiyahe. Maong mopabulhot ang ilang mga driver aron makuha ang quota.
Sa panagtabo sa mga opisyal sa VTI ug ni Cebu City Mayor Edgardo Labella niadtong Nobyembre 3 sa Cebu City Hall, gikasabotan nga ipatuman sa VTI ang 40-kilometer per hour nga speed limit sa pagbiyahe sa ilang 237 ka mga Ceres bus sa kadalanan sa siyudad aron kalikayan ang disgrasya.
Ipatuman sab ang 20 kilometers per hour nga speed limit sa mga Ceres bus kon moagi sila sa mga residential areas. Laing gikasabotan mao ang pagpahigayon og surprise drug test sa Cebu City Office for Substance Abuse Prevention (Cosap) sa ilang mga driver.
Mahitungod sa speed limit, duna bay mga speed gun ang Cebu City Traffic Office (CCTO) nga maoy gitahasan ni Mayor Labella sa pagmonitor sa speed limit sa mga Ceres bus nga nibiyahe dinhi sa syudad?
Si Mayor Labella niingon nga usa lamang ka pribilihiyo ang pagtugot sa mga Ceres bus nga makadagan sa kadalanan sa syudad sa Sugbo. Busa, kinahanglan nga motuman sila sa ilang gikasabotan ug sa mga lagda ug ordinansa sa dakbayan sa Sugbo.
Matod pa ni Mayor Labella, kon mapakyas pagtuman ang VTI mapugos siya sa pagpahunong sa ilang operasyon dinhi sa syudad sa Sugbo. Di ba mobiyahe na man pagbalik ang 1,300 ka mga jeepney?
Laing katarungan sa mga opisyal sa VTI sa hinungdan sa mga aksidente sa Ceres bus mao nga duna silay mga driver nga gikan sa Mindanao ug dili suhito sa mga dalan sa syudad. Motuo mo niini? Di ba nga kon bag-o ka sa usa ka lugar, magkingking unta ka, di ka magdanghag?