Compio: SafeDavao QR

Compio: SafeDavao QR

NAHIMUOT ko nga naminaw sa akong mga higala nga nagkinataw-anay, ug nagpinahambugay kinsay dakog "eye bags."

Miapil ko sa ilang istoryahanay ug miingon ko nga perte nakong hagoka matag gabii, kay nakakuha nakog QR code. Misiga ang ilang mata, nanguntana kanus-a ko nakakuha. Gitubag nako, nga dugay ra, unang adlaw sa pahibalo, mikuha nako, wala ra'y singko-minutos.

Maong nag-decongest ang system, kay sayonan mo'g pila kaha ka tawo ang nagdungan og tuslok sa website sa SafeDavao QR; gawas sa mga taga Davao City, naa pa sab mga taga gawas sa rehiyon ug sa mga kasikbit nga probinsya ang mikuha niini, kay lagi, kung mosulod sila sa Davao City, pangitaan sila niini.

Maayo nalang gilugwayan ang Nobyembre 7 ngadto na sa Nobyembre 23, diin walay deadline ang pagkuha, apan pag-abot sa maong takna, kung wala paka'y QR code, pundo ka gyod sa balay.

Niining maong paagi naa sab miingon nga dalan kuno kini ngadto sa ID system nga planong ipatuman sa kasamtangang gobyerno. Tuod man, makaayo kini, apan suma sa pipila nga daw makawala kini sa privacy, kay imong tanan nga impormasyon ang gobyerno ang gagunit. Pero kay mandu sa gobyerno, wala gyo'y mahimo ang katawhan.

Balik ta sa QR code sa Davao City. Hitsas na sa QR code ang mga kasikbit nga probinsya labi na ang Davao del Norte nga silay unang nagpatuman niini.

Sa pipila ka bahin sa Soccsksarge area, hitsas na sab ang QR code. Naulahi lamang ang Davao City gumikan sa FM (Food and Medicine) pass atol sa hugot nga kuwarantina.

Nan, karon kay wala pa man sab nabalik ang system sa SafeDavaoQR, tug sa ta og taman kay, lauman nga makasulod man ta sa pagbalik sa system, apan mopilit gyod, o kung malampuson man ang registration, lagmit madugayan ang pagpasa sa imong gmail sa imong pinal nga ID nga dunay QR code, -- lagmit madugayan gumikan sa kadaghan, ampo lang ta nga dali lamang, higala.

Unta sa pagbalik sa system, di na sab kini mopid-ok, kay daghan gyod ang magpundo sa balay pag-abot sa Nobyembre 23. Basin mao na kini ang hinungdan nga moubos ang kaso sa Covid-19 sa Davao City kay gamay naman lang ang manggawas, kay ang uban wala man gyoy QR Code mahadlok man dakpon.

Kung moabot ang takna nga Nobyembre 23, unya wala pa nabalik ang system, -- gamay nalang ang makagawas, daghan ang magpundo sa balay. Apan, kini nga sitwasyon layo sa kamatuoran, gumikan naningkamot ang lokal nga kagamhanan sa Davao nga mabalik sa hinanaling panahon ang sistema, aron ang tanang Dabawenyo dunay QR code.

Mag-ampo kitang tanan, nga mabalik na.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph