SA MGA utlanan sa kasiyudaran ug kaprobinsyahan sa Davao Region kagahapon, nagsugod na og pinangitaay og QR code.
Misugat ang taas nga trapik sa mga motorista, labi na og mosulod sa Davao de Norte gikan sa Davao de Oro ug kung gikan sa Davao City.
Nakurat ang mga motorista nga wala pa'y QR code, apan gipaagi man lang gihapon sila kay duna sab mga lugway. Gipahibalo sila sa adlaw nga kinahanglanon na gayod ang QR code.
Gituyo kini karon sa gobyernong lokal ning rehiyon aron dali nalang masubay ang tawo nga posibleng nataptan sa virus. Apan ang pipila nagtuo sab nga paagi kini sa gobyerno, padung sa ID system.
Walay dautan sa pagbaton og QR code, ang nakapait lang diri mao ang pangutana kung kanus-a mabalik ang sistema sa online registration.
Sa Davao City kung dunay lugway nga Nobyembre 23, 2020, unta sa wala pa ang Nobyembre 10 mabalik na ang system aron mahitsas ang tanan, gumikan ning panahona, gikuyaw-kuyawan ang mga tawo basin unya og dunay mga di pa kagawas kay walay QR code; gisulti na baya daan sa lokal nga kagamhanan sa Davao nga walay deadline ang pagkuha niini.
Tambag ngadto sa katawhang naghulat sa online registration, bantaye gyod nga mabalik, aron sa wala pa ang Nobyembre 23 naa nay QR code, aron di makulgot sa balay.
Maayo unta ang makulgot kadtong walay mga trabaho, apan ang delikado kung kadtong padre de pamilya ang di kagawas, seguradong kulob ang kaldero.
Hinaut nga sa hinanaling panahon mabalik na sa LGU-Davao ang sistema sa QR code online registration.