NALUWAS sa mga awtoridad ang usa ka babaye nga molukso na unta gikan sa ibabaw sa tower sa Batulosa, Toril, Davao City kagahapon sa kaadlawon, Nobyembre 6, 2020.
Tungang gabii misaka na ang babaye sa tower gamit ang kahoy nga hagdanan, apan pag-abot niini sa taas nga bahin, nasiplatan siya sa usa ka residente, hinungdan nga gitawgan ang mga awtoridad.
Pag-abot sa mga rescuers, dugay-dugay pa nga nakombinse ang babaye nga mokanaug.
Nasayran nga giplano na sa babaye ang paghikog unta, diin naka-post na kini sa iyang Facebook account.
Sumala sa kapulisan sa Toril Police Station, usa ka menor de edad ang maong babaye ug dunay gimentinar nga tambal, apan niadtong higayona, wala kini kainom.
Sa kasamtangan, anaa na sa pag-amoma sa iyang mga ginikanan ang nasampit nga menor de edad.