NIBIYAHE ko sa lungsod sa Medellin sa miaging Huwebes, Nobiyembre 4, agi sa North Road sa dakbayan sa Mandaue ug sa mga lungsod ug usa ka siyudad sa amihanang bahin sa lalawigan sa Sugbo.
Sa among pagtadlas nianang buntag sa kahuot sa karsada akong nasugatan. Akong napamatud-an ang mga komentaryo sa akong mga higala nga sukad gibuksan ang mga karsada ngadto sa publiko nibalik ang karaang problema nga mao ang makapaluya nga bul-og sa trapiko.
Dul-an sa 20 ka tuig ko nga magbiyahian kaniadto padung sa akong gitrabahoan sa Jagobiao, Mandaue City mao nga wala nako mahibulong. Naanad nako ning maong problema. Naanad na sab ko nga wala pa kakita og solusyon ang gobyernong lokal bisan maibanan na lang og gamay ang kalanrakas sa karsada.
Niadtong mga panahona normal pa ang tanan. Bukas ang tanang opisina, pabrika ug ubang patigayon. Abli pa sab ang akong gitrabahoan kanhi nga mao ang ABS CBN nga sa kanunay hugpaan sa daghang bisita. Ang mga eskwelahan namuwak pa sa daghang tinun-an.
Pero sa akong pagbiyahe niadtong Huwebes nia pa ta sa kulbahinam nga bahin sa atong kinabuhi nangaliya nga dili matakdan sa virus nga makamatay. Sa ato pa dili pa tanan ang way kahadlok nga mogawas sa ilang balay og mogamit sa karsada. Naa pay daghan ang nagpuyo sa balay apul na ang mga nawad-an sa trabaho apil na ang mga tinun-an ngagipailawom sa online ug modular nga paagi sa pagtungha.
Luyo niini hilabihan ka labad sa ulo ang trapik nga nihabol sa kadalanan. Unsa na kaha kong tingklase pa ron ug abli ang tanang patigayon? Siguradong magka murotsing. Trapik man gani nga naa pa ang pandemya.Unsa na kaha kong itugot sa kahitas-annga molayas na si corona.
Di lang kahuot sa trapik ang akong nabantayan sa akong pagpadulong ug balik gikan sa Norte. Ang natanggong nga mga pasahero daplin sa karsada.Unyag hunong sa bus daw gibundakan og ulan nga mag-iyahay og dutdut sa pultahan aron makasakay. Komon kini nga talan-awon ning panahon nga nihit ang public transportation.
Ambot nganong gipasagdaan ning maong problema? Kanang mag-ilog og sakay ang mga lig-on og lawas ray maluwas di ba? Busa ang akong sugyot sa mga gitahasan pagdumala sa trapiko, palihug kaloy-i ninyo ang mga senior, mabdos, PWDs, ug ang gipang-athritis pinaagi sa pagpalinya sa mga pasahero sa mga bus stop. Sa ingon niini nga paagi mahimong hapsay ug patas ang pagsakay. Ang nauna og linya maoy unang makasakay. Dili kay padak-anay sa braso.
Sakto ang gibuhat sa may Bus Stop sa Bulacao, Poblacion Pardo ug sa dalan Colon diin naglinya ang mga pasahero. Kini maoy himoong modelo bisan kong wala nay coronavirus. O, mabalik ma ang mga dyip sa karsada.