NASIKOP sa mga sakop sa Labangon police station ang suspetsadong big-time drug pusher atol sa buy-bust sa sitio Ubca, Barangay Quiot, Siyudad sa Sugbo, pasado alas 6 sa gabii, Nobiyembre 5, 2020.
Ang suspek giila nga si Niel Gabunada Raboy, 30, nagpuyo ra usab sa maong dapit, nalakip sa high value individual sa regional level data base.
Nakuha gikan kaniya ang binulto sa gituohang shabu nga motimbang og 200 gramos nga mokantidad ang tanan og P1,360,000.
Taod-taod na sa iyang illegal nga negosyo si Raboy nga bisan sa pandemic nagpadayon sa pagpamaligya sa illegal nga drugas.
Usa sa mga residente sa dapit ang mihatag sa kasayuran sa kapulisan sa Labangon hinungdan nga ila dayon gilusad ang buy-bust.
Gisubay pa nila kinsa ang nag supply sa illegal nga drugas ni Raboy.
Aduna nay gihatag nga impormasyon si Raboy apan kinahanglan pa nga i-validate.
Moabot sa mga silingang barangay ang pagpamaligya sa suspek lakip na sa pipila ka dapit sa probinsya sa Sugbo.
Si Raboy usa sa mga giingong bigtime drug pusher n nga nasikop sa Cebu City Police Office (CCPO) ning nakalabay nga mga adlaw.
Niadtong Nobiyembre 5, mokabat sa P1.6 milyunes usab nga balor sa gituohang shabu sang nasakmit sa kapulisan atol sa duha ka managlahi nga mga buy-bust.