Mianunsyo ang Kagamhanan sa Dakbayan sa Mandaue nga pabalikon na pagbiyahe ang tradisyonal nga mga public utility jeepney (PUJ).
Matod ni Jamaal Calipayan, executive director sa Traffic Enforcement Agency of Mandaue (Team), nga atol sa ilang pakigtagbo sa kadagkoan sa Cebu, Lapu-Lapu ug Mandaue cities ug Land Transportation Franchising and Regulatory Board (LTFRB), padaganon na og balik ang mga PUJ, apan wala pa silay gikasabotan kon kanus-a.
Matod niya nga ang lokal nga mga kagamhanan na ang modesisyon kon unsa nga mga guidelines o requirements ang angay nilang ipatuman ngadto sa mga jeepney driver una sila makabiyahe og balik.
Apan tungod kay ang rota sa jeep sa dakbayan sa Mandaue motabok sa ubang mga syudad ug munisipalidad, angay pa kini nilang hisgutan sa ubang mga lokal nga kagamhanan, matod ni Calipayan.
Pinaagi sa pagkonsulta sa ubang mga lokal nga kagamhanan, makahimo na sila og mga pamaagi nga maminusana ang trapiko, apan mamahimo gihapong maserbisyohan ang publiko.
Gilaraw sab nila kon ipatuman ba nila ang number coding ug kon kapila ipaubos ang matag jeepney driver sa RT-PCR swab test, labi na nga usa sila sa exposed.
Gani, sabotan pa sab nila ang pamaagi sa pagplite sa mga pasahero, lahi sa naandan nga ipasa-pasa ang plite kay gidili pa ang physical contact.
Dugang ni Calipayan nga inisyal nga giingon sa LTFRB nga 1,000 ka mga PUJs ang makadagan alang sa tri-cities, apan kinahanglan pa nga makapasar sa standard sa Land Transportation Franchising and Regulatory Board (LTFRB).
Gipasalig sab ni Calipayan nga ang mga jeep makabalik sa ilang naandang mga rota.
Lakip sab sa ilang gikasabotan mao ang seating arrangement sa mga jeep kon pabalikon na pagbyahe.
Sa gisugyot sa LTFRB, ang tradisyonal nga mga jeepney magbutang og plastic barrier sa ilang lingkuranan.
Samtang ang mga multicab, mag-one-seat-apart ang matag pasahero ug kinahanglan nga dili ma-atbang.