PIPILA lang ka adlaw human gipahibawo sa Ala Boxing Promotions ang ilang hingpit nga pagpanira tungod ning nagpadayon nga krisis sa pandemya, akong nahinabi ug gipangutana sa makadiyot si Donnie “Ahas” Nietes kon unsay iyang mga plano sa iyang karera.
Moduha na ka tuig nga ang four-division world champion wala makaaway human niya malangkat ang World Boxing Organization (WBO) superfly title niadtong Disyembre 2018 pinaagi sa split decision nga kadaugan batok sa hapon nga si Kazuto Ioka.
Apan ang maong titulo wala ra usab magdugay sa iyang mga kamot sa dihang iya kining gibuhian nianang pagka Marso 2019 uban sa pangamuyo nga mosaka sa iyang timbang aron makaaway og mga dekalidad nga mga kontra, butang nga wala gyud moabot hangtod karon.
Taliwala sa pagbiya sa Ala Gym, ang boxing stable nga maoy naggiya ug nag-ugmad sa iyang karera sukad masukad, nagpabilin gihapon ang damgo sa 38-anyos nga Nietes nga makasangka og mga star fighters sa iyang timbang.
Gitumbok ni Nietes, kinsa maoy mibuak sa record ni Gabriel “Flash” Elorde isip longest reigning world champion sa nasod, mao sila si Roman ‘Chocolatito’ Gonzalez sa Nicaragua, Juan Francisco Estrada sa Mexico ug Srisaket sor Rungvisai sa Thailand.
Apan wa kini moabot kaniya ug gani wala gyud siya makaaway sud sa dul-an na duha ka tuig. Hinungdan nga sa kasamtangan busy pa kaayo kini sa iyang online selling ning nagpadayon nga pandemya.
Di pa lang gyud dugay, ang 38-anyos nga kanhi usa lang ka janitor, nakapirma og kontrata sa MTK Global ug D4G Promotions, sa usa ka dakong promotional outfit nga nagbase sa Dubai.
Siya maoy ikaduhang Ala Boy nga nakapirma sa maong promotional outfit, sunod ni Prince Albert Pagara.
Dako ang pagtuo ni Nietes nga ang MTK Global maoy maghatag kaniya og katumanan sa iyang tinguha nga makaaway nila ni Gonzalez, Estrada ug Rungvisai.
Matod pa sa iyang higala nga taguon ta lang sa ngalan nga Kapitan Clyde Seblos, nga sukad naka pirma sa MTK si Nietes, hinayhinay na usab kining mibalik sa ensayo aron pagpakibhang sa iyang nagkabug-at nga timbang.
Ning bag-ohay lang, dili pa man tuod kompirmado apan dunay posibilidad nga moaway na si Nietes (42-1-5, 23 KOs) karong Disyembre alang sa usa ka tuneup fight.
Gihugonhugonan nga ikasangka ni Nietes alang sa eight-round bout si Renz Rosia. Si Rosia dili kaayo impresibo og record, 16-9-1, 8KOs, apan ang iyang unanimous decision nga kadaugan batok ni world title contender Aston Palicte niadtong Disyembre 2019 maoy nagpamatuod nga aduna kini igong ikabuga.
Si Palicte maoy nakontra ni Nietes alang sa WBO superflyweight title niadtong 2018 nga miresulta sa kontrobersiyal nga panagtabla.
Nakaaway usab kini siya ni Kazuto Ioka sa iyang ikaduhang pagsuway og langkat sa titulo apan napakyas human kini ma-knockout sa ikanapulo nga round.
Giingon nga posibling ang maong away malakip unya sa ikaduhang boxing promotion sa IPI-Omega Boxing Stable dinhi sa Sugbo taliwala ning nagpadayon nga pandemiya.
Pero ang chief trainer sa Omega Boxing Gym nga si Julius Erving Junco mitug-an nga wala pa silay nadawat nga official statement gikan sa ilang labaw kon kanus-a ang ilang promotion.
Ingon niya nga tentatively gikatakda kini sa sunod buwan pero wala pa usab ma-finalize ang tanan. Naghuwat na lang sila og go signal sa ilang labaw.
Last October 7, ang Omega Boxing Stable malampusong mipahigayon og boxing promotions nga maoy unang nahitabo sa nasod sukad gihamok sa coronavirus ang tibuok kalibutan. (jun.migallen22@gmail.com)