KUNG atong tutokan namayat na pag-ayo ang atong presidente tungod sa hilabihan ka bug-at sa mga problema sa atong nasud nga iyang giatubang, kini mao ang kurapsyon, usa kini sa iyang gisaad niadtong panahon pa sa kampanya sa iyang pagpapili sa tuig 2016.
Gumikan sa dakong mga kausaban nga gusto niyang mahitabo, makabungog ang suporta sa mga katawhang Pilipino sa atong mayor sa Dakbayan sa Davao hangtud gihimo nato siyang ika-16 nga pangulo sa atong nasud.
Bisan tuod og wala kaayo’y kausaban nga nahitabo sa iyang mga panaad, pero sa mga survey sa Pulse Asia, ug SWS, makabungog gihapon ang suporta sa katawhan Pilipino kaniya, ngano kaha?
Sa akong ubos ug pinobre nga pangagpas, tungod kay nagtrabaho gyud siya ug seryoso sa iyang gipanulti. Biyaan ta ang droga, tungod kay mi-surrender na siya niana nga lisud pukanon ang mga drug lords, tungod kay dunay International Human Rights (IHR) ug International Criminal Court (ICC) ang kanunay nakatutok kaniya.
Diri kita mutotok sa kurapsyon tungod kay walay mga international organizations nga maki-alam niini. Kamatuoran, gi-awhag ni United Nation Secretary General Antonio Guterres ang mga kanasuran sa kalibutan sa pagamit sa United Nations Convention Against Corruption (UNCAC), ang International anti-corruption treaty nga giratipikahan, gidawat ug giaprobahan sa kapin sa usa ka gatos ka mga nasud lakip na ang Pilipinas.
Ang maong treaty, mahimong gamiton nga hinagiban batok sa kurapsyon pinaagi sa preventive measure criminalization and law enforcement, international cooperation asset recovery ug technical assistance and information exchange.
Gilaoman nato nga dinhi makatutok ang atong presidente, uban sa atong pagtabang, ug dili magpunay og saway kay wala kita’y mahimo diha. Duna na kitay Presidential Anti Crime Commission (PACC), ug karon, dili pa gayod igo nagmugna na ang presidente ug Mega Task Force (TF) versus Corruption, diin ang gitahasan mao si Department of Justice (DoJ) Secretary Menardo Guevara nga maoy mag-imbestiga.
Nag-una dinhi nga imbestigahan mao ang Department of Public Works and Highways (DPWH), Philippine Health Insurance Corporation (PhilHealth), Bureau of Immigration (BI) Bureau of Customs (BOC) ug Bureau of Internal Revenue (BIR).
Kung atong timbang-timbangon pag-ayo kining duha ka ahensya sa atong gobyerno, ang BIR ug BOC mao kini ang pinakadakong ahensya nga maka-kolekta og dagkong buhis aron maoy makatubag sa tanang mga panginahanglan sa atong gobyerno, ug kung kini maoy malambigit sa kurapsyon, hugno ang atong gobyerno.
Atong suportahan ang kampanya sa atong presidente, apan, adunay pero? Nga unta walay exemption, walang palakasan, walay pag-ila sa utang na loob sama kang Francisco Duque, ug kang Mark Villar.
Para nato imposible man og wala silay labot sa talamak nga kurapsyon sa ilang gipangulohan nga ahensya.
Go ahead Mr. President wala na’y sagabal niining imong kampanya, kay wala na’y international organizations nga makababag nimo, manubag ang angay manubag, makalabuso ang angay makalabuso.