SELOS ang motibo sa suspek sa pagpatay sa iyang live-in partner, kinsa naggulgol sab kini sa iyang liog dihang iyang nakita nga patay na iyang kapuyo.
Ang insidente nahitabo alas 8:15 sa gabii, niadtong Biyernes, Nobyembre 6, didto sa Purok 4, Barangay La Fortuna, M’lang, North Cotabato.
Giila ang mga nakabsan sa kinabuhi nga sila Emelyn Pawon Liwantang, 35-anyos ug ang kapuyo niini nga si Eddie Pael Sumongsong, 38-anyos, mag-uuma, ang duha residente sa nasampit nga dapit.
Sa taho sa M’lang police, nagkalalis ang suspek ug ang biktima sulod sa ilang balay nga misampot sa grabeng pagbinayluay sa mga mahait nga pulong.
Giakusahan sa suspek ang iyang live-in partner nga dunay laing ka-relasyon.
Namugos ang suspek nga kuhaon ang cellphone sa babaye gumikan dunay ka text ug ka-chat nga lalaki.
Tungod sa kasuko sa suspek mikuha kini og lagaraw, diin gitigbas sa makadaghang higayon sa babaye.
Sa diha nga nakita sa suspek nga naligo na sa iyang kaugalingong dugo ang biktima ug medyo naulian na sa iyang kasuko, iya sab nga gigulgol ang iyang liog.
Pulos patay na nga nadiskubre sa ilang pamilya ang maglive-in partner.
Sa kasamtangan ang kapulisan sa M’lang ang padayon nga nag-imbestiga kalabutan sa maong hitabo.