NIADTONG buwan sa Septiyembre nakit-an nga galibud-suroy sa kadalanan sa Dallas, Estados Unidos ug murag wala na kini sa iyang pamuot ang kanhi National Basketball Association (NBA) player nga si Delonte West.
Ang 37-anyos nga kanhi guard mikita og milyones sa iyang walo ka mga tuig sa NBA ug laing tuig isip overseas player sa China apan nahurot kini og nagpuyo na lang siya sa kalsada.
Sa pag-viral sa nahitabo kang West, daling mitunol og tabang si Mark Cuban, ang tag-iya sa Dallas Mavericks nga maoy uwahing team nga giduwaan ni West sa NBA.
Gidala ni Cuban sa rehabilitation facility sa Florida si West, kinsa gituohan nga adunay drug addiction ug bipolar disorder.
Sulod sa dul-an duha ka mga buwan nga rehabilitasyon, gipakita ni Cuban sa iyang Twitter post nga hinay-hinay na nga naka-recover si West ug nakabalik na kini og physical activity.
“Because we all want something to feel great about today, here’s your Delonte West update. It’s still an uphill battle, but he’s climbing,” suwat ni Cuban sa iyang Twitter post.
Ang maong post adunay duha ka litrato ni West nga nag-rowing ug nagdala’g Frisbee discs kauban ang laing tulo ka lalake sulod sa rehab facility.
Dugang sa bilyonaryong businessman nga iyang gi-post ang update ni West kay aduna kini daghang fans nga gaatang kon naunsa na ang kanhi superstar sa Saint Joseph’s College. (RSC)