GIPUSIL sa ulo ang usa ka 20 anyos nga lalake sa wala pa mailhing mga mamumuno sa Sitio Lapyahan, Barangay Labogon, Mandaue City, kagahapon sa alas 11 sa buntag, Nobiyembre 8, 2020.
Giila ang biktima nga si Prince Logronio, 20, ug residente sa maong dapit.
Matod ni PSSG. Lenmar Contillas, desk officer sa Basak Police Station, nga sa inisyal nga imbestigasyon si Logronio naglakaw sa maong dapit ug kalit lang giduol sa duha ka wala pa mailhing mamumuno nga nagsul-ob og Rastafarian Tube Bonnet.
Gipusil dayon sa usa sa duha ka mga lalake si Logronio tumong sa ulo ug sa lawas sa biktima.
Daling midagan ang duha ka mamumuno ug wala na mahibaw-i kon asa kini paingon.
Matod ni Contillas, nakadawat sila og tawag sa tanod sa Barangay Labogon ug daling miresponde ilang tropa kauban ang Scene of the Crime Operatives (Soco) sa lugar.
Apan, wala na nila maabti ang lawas ni Logronio tungod gidali kini og hatod sa tambalanan ug didto na gideklara nga wala nay kinabuhi.
Ang kapulisan nga miresponde sa lugar nakakuha og unom ka fired cartridge case ug duha ka fired bullet.
Gidugang ni Contillas nga sa ilang imbestigasyon si Logronio wala kini kriminal record gani suma sa kabanay niini nga wala sab kini mga kontra.
Kasamtangang, blanko pa ang kapulisan sa motibo sa pagpatay hinungdan nga ilang gipalawman ang ilang imbestigasyon ug matumbok ang mga mamumuno sa batan-ong Logronio.