DUNA tay mga Frontliner batok Covid-19 ang nibiyahe karong bag-o aron tabangan ang mga biktima sa bagyong Rolly didto sa Bicol. Naglakip ni sa atong mga pulis nga gituyo sa pagpadala didto. Dili ni bag-o nga may augmentation force nga ipadala ang Philippine National Police (PNP) sa mga dapit nga giduaw og katalagman.
Unsa man tuod ang mahimo sa mga pulis sa usa ka dapit nga gikusokuso sa bagyo kon sila mismo biktima sab sa maong katalagman. Ang ila ra sab nga mga kaubang pulis gikan sa ubang rehiyon ang mopuli sa ilang dapit.
Gikinahanglan kaayo ang ilang presensiya pagsiguro nga mopatigbabaw kanunay ang kahapsay ug kalinaw sa rescue and recovery operation. Apil na ang pag-apud-apod sa hinabang nga kanunayng dumogon sa mga biktima.
Nakapahinumdum nako ni sa bagyong Yolanda niadtong Nobiyembre 8, 2013. Usa ka contingent sa atong kapulisan gikan sa Police Regional Office 7 (PRO) 7 ang gipadala didto sa Leyte ug Samar. Ang duha ka mga dagkong isla sa Rehiyon 8 ang nagrabihan sa maong bagyo.
Gawas sa minilyon ka pisos nga balor sa kabtangan ang napildi, gatosan sab ka kinabuhi ang nangamatay ug naangol.
Usa sa apil sa maong contingent mao si Cpl. Clifford Caputolan. Sa iyang asoy dili sayon ang ilang misyon sa maong mga dapit. Duha ka opisyal nga sila si PCapt. Alvino Enguito ug PCapt. Remel Von Alegria ang nangulo sa ilang grupo nga may gidaghanon nga 30 ka buok.
Niadtong panahona, ang director sa PRO-7 mao si Gen. Danilo Constantino. Sumala ni Cpl. Caputolan sa pagkadawat pa lang niya sa order isip kabahin sa augmentation force, lahi nga pagbati ang nihakop sa iyang kasingkasing. Kaluoy sa iyang mga kaubang pulis sa PRO 8 nga mga biktima sa katalagman, ug ang mga sibilyan nga nagrabihan ilabi na kadtong nagpuyo daplin sa baybayon.
Nobiyembre 9, usa ka adlaw human sa bagyo, naabot sila sa siyudad sa Ormoc nga maoy ilang gikampohan. Mga direktiba gikan sa PRO 8 maoy ilang gisunod pinaagi sa paggiya nila ni Capt. Alegria ug Capt. Enguito. Sa Ormoc pa lang, nakita ni Caputolan kon unsa gyud ka mangtas ang bagyong Yolanda. Di matukib nga kaluoy ang ilang gibati.
Tumang kaluoy ang gibati sa ilang grupo nga direktang nakig-abin sa mga biktima sa bagyo. Sakwat didto, sakwat diri sa mga pagkaon ug ubang hinabang sa mga delivery nga ilang gieskortan. Hapit tanang suok ilang gibahasbahas adlaw ug gabii pagtuman sa ilang misyon.
“Daghang higayon nga mo-escort mi og mga truck nga puno sa relief goods. Way gipili nga oras ug dapit,” asoy ni Cpl. Caputolan.
Lakip sab nilang gikuyogan mao ang nagkadaiyang grupo sa mga langyaw nga nagpahigayon og relief operation. Kon may sitwasyon didto nga gusto niyang handumon kanunay, kini mao ang nagbanig nga mga biktima nga nakabsan sa palad gumikan sa pagtubo sa tubig.
Human sa pipila ka semana nga pakig-unong sa mga biktima ni Yolanda, nabalik ang ilang grupo dinhi sa Sugbo pagka Disyembre 17. Sila ang frontliners sa maong panahon nga naglakip sa ilang mga kaubang pulis nga sa amihanang Sugbo gipadala. Mga sakop sila sa Class 2011 ug 2012 sa PNP nga hangtod karon pabiling frontliners sa lain na sab nga misyon nga mao ang gubat batok Covid-19.
Nakadawat ta og mga positibong feedback sa atong Asoy niadtong Sabado diin gihisgutan nato ang pagpalinya sa mga pasahero sa mga PUJ ug bus stop paglikay sa kahasol sa atong pagsakay. Matod sa usa ka Mrs. Ubania nga taga Inayawan, Cebu City, nga pait kaayo alang nila nga mga babaye labi na sa mga edad edaran nga matag sakay mag-antos sa inilogay nga makakapyot labi na sa rush hour.