NAHIMONG sumsoman ang presidential election sa Estados Unidos. Labi pa nga morag gipaigot ang pag-ihap sa mga boto tali sa incumbent nga si President Donald Trump sa Republican Party ug sa challenger nga si kanhi Vice President Joe Biden sa Democratic Party.
Gidugangan pa sa akusasyon ni Trump nga gitikas ang eleksyon. Mao ni ang labing unang presidente sa Amerika nga namasangil nga gitikasan. Sagdi na lang sa Pilipinas kay duha ra man ka klase ang mga kandidato dinhi – ang nakadaog ug ang gitikasan.
Mao kana nga daghan ang niingon nga natakdan ang eleksyon sa Amerika sa eleksyon sa Pilipinas. Dunay pay nagduda nga tingali kon dunay Pilipino nga adviser si Trump kay tikas man ang pirming gihisgotan.
Ang mga dagkong media organizations sa US nideklarar nga si Biden, 77 anyos, mao ang president-elect. Pildi si Trump, 74 anyos. Ang usatoday.com nitaho nga nakakuha si Biden og 290 electoral votes samtang 214 ang kang Trump. Nagkinahanglan lang og 270 ka electoral votes aron modaog.
Wa magsilbi ang mga pamakak ni Trump. Sumala pa sa washingtonpost.com, nga nag-ihap sa mga bakak ni Trump sukad sa iyang paglingkod sa katungdanan niadtong Enero 20, 2016, miabot nag 25,000 ang mga bakak ni Trump.
Usa na niini nga hapit na mahanaw ang Covid-19 bisan kon 230,000 na ka mga Amerikano ang namatay niini. Bakak kini nga makadaot. Matod pa ni Mark Twain, “An injurious lie is an uncommendable thing; and so, also, and in the same degree, is an injurious truth--a fact that is recognized by the law of libel.”
Ang akong mga higala nga suhito ug nakasaksi sa eleksyon sa Amerika niingon nga usa ka ordinaryong adlaw ang election day didto. Di sama dinhi sa ato nga gideklarar gyud nga holiday, way trabaho.
Apan tungod sa coronavirus pandemic nga nagkinahanglan og social distancing, mokabat sa 100 milyones ka mga botos gipaagi sa post office. Ang ilang balota nga gihug sa post office naabot gyud sa ilang election centers sa tukmang panahon.
Unsa kahay mahitabo kon buhaton sad dinhi sa Pilipinas ang mail-in voting? Pila kaha ka buwan una moabot ang balota nga gipaagi sa post office? Dugang pa niini, lunggubon man gani ang ballot box, ang mail-in ballots pa kaha?