SADYA kaayo ang among pamilya kung moabot na ang bulan sa Nobyembre. Dili kay taliabot na ang Pasko kon dili, dinhi natawo ang duha ka mahal namo sa kinabuhi, ang among mga ginikanan nga si Antonio Sr. nga natawo sa Nobyembre 7 ug Crispina sa Nobyembre 11.
Sa ilang adlaw'ng natawhan tingali gikuha ang sikat nga tindahan nga 711. Hinuon, namatay ang among amahan sa panuigon nga 88-anyos tungod sa sakit mga 16 ka tuig na ang nilabay samtang nagpabiling baskog, puwera buyag, ang among inahan nga magsaulog sa iyang ika-95 nga adlaw'ng natawhan ugmang adlawa.
Natawo ug nagdako siya sa Clarin, Bohol ug sa sayo nga panuigon naminyo sila sa among amahan sa panahon sa ikaduhang gubat sa kalibutan ug nanimpalad dinhi sa Mindanao.
Halos tanan sa ilang 11 nga nabuhing mga anak dinhi na natawo sa Mindanao. Usa ako sa saksi sa kalig-on og kababayen-an o "women power" kay di lalim nga magmatuto og 11 ka anak, wa pay labot ang upat pang daan nga anak sa among amahan sa una niyang asawa nga namatay sa panahon sa giyera.
Maglisod man gani ta karon bisan 2-3 lang ang anak tungod sa kamahal sa palaliton bisan anaa pay trabaho. Apan lahi ang among pagsaulog sa ilang adlaw'ng natawhan karong tuiga tungod sa Covid-19.
Akong mahinumduman sa iyang ika-90 nga adlaw'ng natawhan nga nagpahigayon kami og dako nga salo-salo alang kaniya diha sa World Palace og nagpalupad og 90 ka balloon isip pasalamat sa hataas nga grasya sa kinabuhi nga gihatag kaniya sa kahitas-an.
Siyempre, kulang ang among pagsaulog kung walay kantahan og sayawan nga gidalit namong iyang mga anak, mga apo, ug apo sa tuhod. Apan bisan pa man sa pandemya, amo gihapong saulugon ang pinasahing paagi sa pagtimbaya kaniya ugmang adlawa.
Imbis kaming tanan magkatapok sa usa ka lugar, ang tagsa-tagsa namo ka pamilya moduaw kaniya ug magdala'g bisan unsang makaon aron idalit sa mga mobisita kaniya. Daw mag-"courtesy call" na lang mi kay "check attendance" ra ba ug naay silot sa mga absinos.
Sa bag-ong executive order ni Mayor Inday Sara Duterte, gilikayan na usab nga magtapok ang daghan kay apil ang Davao City nga "highest pointer" sa pinakadaghang bag-ong natakdan sa sakit. Ang among drayber ug finance staff nagkurentinas sugod niadtong niaging semana kay nakauban nila ang igsuon sa among finance staff nga nag-positibo sa swab test.
Lisod na'g matakdan pa ang among inahan kay matud pa ra ba niya kaniadto nga kung moabot pa siya'g 95-anyos, sayon na lang unya ang pag-abot sa 100. Busa tungod kay Covid man, ang uban namong igsuon mag Zoom meeting na lang ugma.
Imbis nagplano unta mi nga pakantahon ang iyang mga apo sa mga kantang binisaya sa Banikanhon, basin i-zoom na lang o kaha i-tape aron iyang mabalik-balik sa pagpaminaw.
Di lalim ang naagiang kasinatian sa kinabuhi sa among inahan busa dako kaayo namong garbo nga mapakita namo sa among pagmahal kaniya isip pasalamat s gasa sa kinabuhi nga iyang gihatag kanamo. Happy birthday Mama!