Editoryal: Motuman gayod sa gobyerno

HUSTO ang Marilog Police nga kung dili kinahanglan ang pag-agi sa ilang utlanan, kung taga Davao ka, mas maayong mobalik sa giagian.

Kini karon ang nahitabo sa Marilog District sa Davao City kay di gyod paagion sa mga pulis ang mga behikulo nga taga Davao City kung walay importante labi na kung manglaag lang.

Namatikdan man gud sa otoridad nga magdasok na ang mga tawo sa mga suroyanan sa Marilog ug Buda, kay lagi bugnaw man dihang dapita.

Sumala ni Police Captain Philip Dave Uddin, ang station commander sa Marilog Police Station, nga hugot ang seguridad nga ilang ginapatuman subay sa mga executive order (EO) nga ginapagula sa lokal nga kagamhanan sa Davao City.

Ginapangutana nila sa ilang checkpoint kung asa paingon ang motorista, ginasubay kung naa bay menor de edad ug dunay bay 65-anyos pataas, agi'g pagsunod sa EO nunot sa pagpatuman sa mga regulasyon sa community quarantine sa pandemya.

"Starting pa sa atong ECQ, atoa nang ginapatuman ang hugot nga pag-inspection. Ang dili essential labi naning laag-laag diri sa Marilog ug Buda, dili na sila dali-dali nga makaanhi labi na og naay edaran ug menor nga usa sa mga anaa sa atong EO," sulti ni Uddin nga nahinabi sa Superbalita Davao pinaagi sa telepono kagahapon.

"Amoa gyod nga ginapabalik, di gyud sila kalusot, gina-interview gyod na nato sila sa atong checkpoint. Halos taga Davao City tanan, mao nang trapik ta gamay kay gina-isa isa gyod nato sila sa pagpanguntana," sumpay sa gisulti sa station commander.

Kung wala lang man gani importante, magpundo sa balay, likayan sa karon ang laag, unsa lang gud na kung wala nay Covid.

Ning panahona matinabangay ang matag usa aron mapukan gyod ning kalaban nga di makita.

Ang pagsunod sa katawhan sa mga gipatuman sa otoridad maoy bugtong makahaw-as niining pandemya nga halos mag-usa na ka tuig.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph