NAA na tingale sa dugo sa tawo nga tikasan nga di makadawat nga mapildi. O mahimo sab nga nagpabuhi lang gyud sa dugo si Bongbong Marcos.
Makapahimuot man gud nga ang tawo nga nipadayong nagpabuhi pa sa iyang namatay na unta nga protesta nga si Justice Marvic Leonen, iya na hinuong ipa-inhibit sa iyang protesta batok sa kadaugan ni Bise Presidente Leni Robredo.
Human sa iyang recount diin nadugangan hinuon ang boto ni Robredo, angay na unta i-dismiss ang iyang protesta. Apan gipapadayon kini ni Leonen.
Mao nga nakaingon ko nga pabuhi sa dugo ra gyud kining kang Bongbong.
Hinuon, dunay dakong posibilidad nga nagkinahanglan si Presidente Duterte ni Bongbong isip bise presidente. Unsaon, nikugi man sa pag-ayo si Bise Presidente Robredo.
Sukad nibuto ang Covid-19, ang opisina ni Robredo ang kugihan pag-ayo sa pagtabang sa mga frontliner, mga tinun-an, ug uban pa. Nisamot ang kalihokan ni Robredo human sa bagyong Rolly. Halos kada adlaw na gud.
Dayon tawgon si Robredo diha sa Facebook nga Busy President. Sa laing bahin, duha ka adlaw human sa bagyong Rolly pa nagpakita ang Presidente Duterte.
Makita sa tibuok nasud, nga diay kugihan nga bise presidente ug presidente nga gipasiawan lang hinuon nga natulog panahon sa bagyo.
Daw nadungan kining lakang ni Bongbong sa kang Solicitor General Jose Calida. Kining opisyal nga nikampanya kang Bongbong sa miaging 2016, nagpabagag nawong ug nisang-at og opinion sa Korte Suprema nga isip Presidential Electoral Tribunal (PET), mahimo kining mobale wala og mga eleksyon.
Ambot, kon dunay tikas nga nakabenepisyo si Robredo, maapil unta ang mga boto ni Presidente Duterte.
Sinas
Atong ipaabot ang pahalipay alang kang bag-ong natudlo nga PNP Chief Debold Sinas.
Daghan kaayo ang nangalipay labi na dinhi sa Sugbo tungod sa iyang pagka tudlo. Hilig man sag gyud kadto si Sinas nga maabi-abihon.
Apan sa laing bahin, daghan sab ang nakasaway kay kining opisyal nga wala mosunod og lagda sa health protocol kay walay mga maskara ug wala social distancing atol sa usa ka mañanita kay birthday sa heneral.
Binugo
Dugay na nga dili epektibo ang kintahay pag-rescue sa mga giingong “homeless” sa syudad sa Sugbo. Mobalik man kana sila kay dili man ang pagpauli lang ang sulbad sa maong problema.
Apan mao gihapon ang gibuhat sa atong mga opisyal sa syudad ug mahibulong nganong mamalik sa dalan kining mga tawhana.(@anol_cebu sa Twitter)