NAKASUON. Dinhi sa ato, ang mga pulitiko nga mapildi sa piliay unya moreklamo nga gitikasan maoy sumsuman sa bugal-bugal dili lang dinhi sa nasud apan lakip na sa gawas, labina ang Amerika, nga numero nga hinawayon sa atong sistema sa pamulitika ug piliay tungod kay sa ilaha ang mapildi modawat dayon sa kapildihan.
Apan ning 2020, dunay dakong kausaban ang Amerika, nga maoy gitamod sa tibuok kalibutan nga numero uno nga demokratiko, lig-on ug kusganon nga nasud. Sa piliay sa pagka presidente niadtong Nov. 3 diin nagpasubli si Pres. Donald Trump, daghan ang kausaban nga nasinati di lang sa mga Amerkano apan lakip na ang mga dagkong nasud nga naniid sa dagan sa piliay.
Daghan ang dili makatuo nga dauton ni Trump ang integridad sa ilang piliay. Matud pa ni Trump modawat lang siya sa resulta sa piliay kon siya ang modaug ug kon mapildi gitikasan siya. Ug tinuod man iyang giakusahan si Jose Biden, iyang kaatbang, nga nanikas kay napildi man siya. Ang Amerika karon ang sumsuman sa komedya kay si Trump di makadawat nga napildi. Lakip na ang nakapusta.
Ang akong suod nga mga higala nagkomedya nga basin ang consultant ni Trump taga ato. Kay atong nasinati diri nga ang mapildi sa piliay dali mosiyagit nga gitikasan. Apan sa miaging piliay pagka presidente, ang mga kaatbang ni Pres. Digong Duterte wa na magduha-duha pa sa pagdawat sa ilang kapildihan.
* * *
LIBRE? Sa 500 ka mga drayber sa Ceres Bus nga gi-drug test tungod sa nagsunod-sunod nga hitabo nga daghan ang naligsan-patay, ang 160 niini gideklarar nga negatibo sa ilegal nga drogas. Apan wa ni magpasabot nga ang 340 nga mga drayber nakalingkawas.
Nabaniog nga ang mga drayber nga mobiyahe og lagyo, magshabu aron di sila magduka. Bisan ingnon tang pung nga wala magdrogas ning mga drayber sa mga kompaniya sa bus, apan morag ang tanan nakasinati nga dunay mga abusado nga drayber. Kana bang batasan nga nagtuo nga hawod siya sa dalan kay bus ang gidrayban ug ang tag-iya dunay impluwensya.
Matod pa sa Land Transportation Franchising Regulatory Board (LTFRB) nga nakabalik na ang mga drayber sa Ceres bus human sa ilang safety seminar ug sa drug test. Maayo ang resulta sa seminar sa LTFRB kay niadtong Dominggo nakamatikod ko nga di na mopaharorot og padagan ang mga drayber sa Ceres.
Angay nga ilakip sad og seminar ang mga drayber sa PUJ kay makabiyahe na man sila og balik. Sa wala pa ang kwarentinas, ang mga drayber sa PUJ mora sad og hari sa dalan modrayeb.
LTRFB -7 Director Eduardo Montealto, Jr. maayo gyud nga seminaron sad ang mga drayber sa PUJ sa di pa sila mobalik og biyahe aron di mosamot og kagubot ang trapiko sa siyudad. Salamat!