MAJOR General Debold Sinas gitudlo nga bag-ong Philippine National Police (PNP) chief sugod sa Nobiyembre 10, 2020.
Si Presidential Spokesperson Harry Roque nipahibawo niini atol sa regular nga virtual press conference sa Lunes, Nobiyembre 9, 2020.
Si Sinas, kinsa regional director sa National Capital Region Police Office (NCRPO), mohulip kang PNP Chief Camilo Cascolan, kinsa gitakdang moretiro sa Nobiyembre 10.
Si Cascolan nagsilbeng PNP chief sud lang sa duha ka mga buwan kay niadto lang Septiyembre 2 siya niasumer hulip kang retired general Archie Gamboa.
Si Sinas nagsilbe sab kaniadto isip direktor sa Police Regional Office sa Central Visayas, diin kapin sa P1 bilyong illegal drugs ang nasakmit.
Isip hepe sa NCRPO, gikiha siya sa Mayo 2020 uban sa 18 ka mga police official tungod sa paglapas sa quarantine protocol dihang napakyas siya sa pagsanta sa mañanita alang sa iyang adlaw nga natawhan dihang ang Metro Manila ubos pa sa enhanced community quarantine (ECQ).
Nakaplagan sila si Sinas ug uban pa nga nakalapas sa City Ordinance No. 12 sa Taguig City, nga nagmando sa pagsul-ob sa face masks sa publiko.
Gidepensahan siya ni Presidente Rodrigo Duterte ug gipabilin sa katungdanan kay siya “good and honest man.”
Si Roque niingon nga ang Presidente wa mopasabot kon nganong si Sinas ang iyang gipili.
Matod niya nga dugay nang gidayeg ni Duterte si Sinas sa iyang natampo sa gubat batok sa drugas sa iyang administrasyon. (SunStar Philippines)