GIKANSELAR sa Minore Del Santo Niño ang dagko ug relihiyusong mga kalihukan gawas sa simbahan atol sa pagsugat sa ika-456 ka tuig nga anibersaryo sa kapistahan ni Señor Sto. Niño.
Ang mga kalihukan tipik na sa tinuig nga kalihukan sa Sinulog ug gidagsa sa liboan ka mga tawo.
Gumikan niini, ang mga kalihukan naglakip sa Penitential Walk with Jesus sa opening salvo, Penitential Walk with Mary sa katapusang adlaw sa novena, Traslacion sa imahen ni Sto. Niño ug Our Lady of Guadalupe gikan sa Cebu City paingon sa Mandaue City lahos sa Lapu-Lapu City, seaborne procession ug reenactiment sa unang bunyag, pag-ugbok sa krus ug ang pagpahigayon sa unang kasal, Solemn Foot Procession ug proposed Cebu Provincial pilgrimages.
Ang Basilica, Cebu City Goverment, Cebu City Police Office, Inter Agency Task Force (IATF) nipagawas og joint advisory para sa simplified celebration para sa Fiesta Señor.
Taliwa sa pagwagtang sa mga kalihukan, wala say ipahigayon nga mga motorkada sanglit makamugna gihapon kini og tapoktapok sa mga tawo hilabi na sa paglabay sa imahen sa Balaang Bata.
Apan gipadayag sa Basilica, inubanan sa suporta sa Cebu city Government ubos sa liderato ni Mayor Edgardo Labella, nga iapil sa kalihukan sa umaabot nga selebrasyon sa ika-500 ka tuig pag-abot ni Sr. Sto. Niño dinhi sa Sugbo karong Abril.
“The Agustinian friars and the Executive Committee of the Fiesta Señor , with the support of the Cebu City Government, will reappropriate the cancelled external activities to the upcoming 500 years celebration of the arrival of the venerable image of Snr. Sto. Niño in coordination with the activities of the Archdiocese of Cebu in April 2021,” matod sa pamahayag.
Sila si Rev. Father Pacifico Nohara Jr., rector sa Basilica, Konsehal Phillip Zafra, chairman sa committee on public safety sa konseho, Konsehal Joel Garganera, IATF deputy chief implementer sa Cebu City, Police Colonel Josefino Ligan ug Labella, nangayo og pagsabot sa publiko.
“Ask the understanding of the Cebuanos as we take these precautions to protect the health of our Catholic faithful and devotees, and those who wish to participate in these activities,” tipik sa ilang joint advisory. Ang Basilica magsugod sa ilang novena karong Enero 8 hangtod sa Fiesta Señor sa Enero 17, diin ang misa pagasugdan alas 5 sa kadlawon ug gibahen sa Bisaya ug English.