NAGPLANO ka bang manaygon niining nagsingabot nga Pasko sa Dakbayan sa Sugbo?
Ayaw nalang kana padayona kay ang maong tradisyon paagi sa pagpangayo og pinaskohan, idili na.
Kini maoy gipahibawo ni Mayor Edgardo Labella nga kabahin sa mga lakang aron mapugngan ang pagkatap sa coronavirus disease (Covid-19) sa dakbayan, ilabi na nga gitinguha ni Labella nga magpadayon ang pagkunhod sa kaso sa coronavirus.
“Karong adlawa, mag-isyu ta og Executive Order number 104 nga dili una nato i-allow ang customary nato nga carolling sa kabalayan, kadalanan ug sa mga sakyanan,” matod pa sa mayor kansang tinguha nga mapugngan ang pagkuyanap sa virus nga nipatay na og 680 na ka mga kinabuhi.
Mihangyo og pagsabot ang opisyal ngadto sa publiko nga sa niining nasinate nga sitwasyon diin anaa pa ang presensiya sa Covid-19 ilabi na nga tradisyon sa matag Filipino ang caroling o pagpanaygon sa higayon nga magsingabot ang kasaulogan sa Pasko, apan niining tuiga gidili ang maong kalihokan.
“In order to ensure that the City’s programs and measures to mitigate the spread of the Covud-19 is maintained, the City of Cebu sees the need to impose a ban on street caroling within Cebu City within the period of community quarantine,” tipik sa natala sa executive order nga giluwatan ni Mayor Labella.
Sa sayo pa, ang Cebu City aduna nay City Ordinance no. 1931 nga gipatuman kaniadto nga nag-ban sa panaygon sa karsada sa siyudad sa higayon nga walay permit gikan sa Office of the Mayor.
Base sa maong ordinansa, gitugotan lang nga makapanaygon gikan Disyembre 16 hangtod sa unang semana sa Enero ug gitahasan ang mayor sa Cebu City Police Office, Cebu City Transportation Office ug Prevention Restoration Order Beautification Enhancement (Probe).
Usa ka tradisyon sa mga Pinoy nga gipatuman sa Inter Agency Task Force (IATF) lukop nasud diin gidid-an ang pagduaw sa mga sam-ang atol sa Kalag-Kalag ug gipasirhan ang publiko ug pribadong mga sam-ang gikan niadtong Oktubre 29 ngadto na sa Nobiyembre 3.
Nakita nga epektibo ang maong paagi nga pabiling ang pagkunhod sa kaso sa Covid-19 ilabi na sa dakbayan sa Sugbo.