SUKAD gipatuman sa gobyerno ang nagkadaiyang kampanya aron mapugngan ang pagkuyanap sa coronavirus disease 2019 (Covid-19) sa atong nasud, akong namatikdan nga managlahi ang paagi sa mga lokal government units (LGUs) dinhi sa Davao Region.
Kining managlahi nga paagi sa mga lokal nga opisyal maoy nakapalibog sa katawhan kung unsay maayong buhaton tungod kay gubot pas lukot ang implementasyon.
Mao man gud kini ang akong nadawat nga mga reports sa among provincial correspondents sa radyo hinungdan nga gibaha kami sa mga pangutana.
Pipila sa mga polisiya nga nagsumpaki ang tanang munisipyo, siyudad, ug probinsya mao ang pagpatuman sa health ug quarantine protocols.
Kini ang hinungdan nga magkabuang usab kami og tubag sa mga pangutana sa among programa. Maayo nalang kay duna kami mga higala nga opisyal sa probinsya nga makatubag sa mga pangutana.
Ning uwahi nga kalibog sa katawhan kining pagpatuman sa QR code system aron mapalambo ang paningkamot nga masubay dayon ang mga tawo nga nagdala sa makamatay nga kagaw.
Nalibog ang katawhan sa rehiyon tungod kay pipila na ka probinsya ug siyudad sa rehiyon ang nagpatuman sa QR code.
Kinsa bay di malibog niini nga kung taga Davao de Oro ka, kinahanglan nimo nga magkuha og QR code sa Davao del Norte. Ug kung ugaling naa kay transaksyon sa siyudad sa Davao, kinahanglan sab nimo nga naay QR code gikan sa Davao City.
Nindot man kini nga paningkamot sa gobyerno, apan nindot gyud nga naplano nila pag-ayo ang ilang mga estratehiya.
Usa sa akong gihimong sanglitanan nga wala naplano pag-ayo sa Davao Regional Task Force on Covid-19 (RTF11-Covid19) mao ang sugyot ni Dr. Cleo Fe Tabada, head sa Regional Epidemiology and Surveillance Unit sa DOH-Davao, nga maghiusa ang tanang opisyales sa rehiyon sa pagpatuman sa QR code.
"We're hoping that the QR codes can be connected. I'm not techie, but it's much better that way because it would be helpful to locate and to help out in contact tracing... because we move around. We go from one province to the next. So, it would be nice if there's a way to put all these together because I'm sure they have assets and if we can connect them, it would be helpful in the big tracing system," sulti sa opisyal sa media.
Buot ipasabot nga di na mag-ihayay ang mga siyudad ug probinsya aron nga dali ra unya nga masubay ang mga tawo nga positibo sa Covid-19.
Sa akong pag-analisa, basin wa gyuy nahitabong panagsabot-sabot sa mga opisyales sa Task Force aron makabaton og hiniusa ug epektibong estratehiya? Kay kung nagsabot-sabot sila, hapsay unta ang ilang mga polisiya.
Bitaw, mga pinalangga nakong tigbasa, unsaon pagpakgang sa di makita nga kontra kung ang mga opisyales sa gobyerno nag-iya-iya, o kaha walay maayong lider ang Task Force nga modumala nila?