KIDAPAWAN CITY -- Nagbitay pa ang pusod sa masuso nga gilabay o gibilin daplin sa irrigation canal nga nakaplagan alas 7:25 sa gabii, Lunes, Nobyembre 9, sa probinsya sa Cotabato.
Matud ni Midsayap Chief of Police John Miridel Calinga nga nakadungog og hilak sa bata ang mga molupyo duol sa NIA-12 Irrigation canal sa Barangay Poblacion 7, Midsayap, North Cotabato.
Sa diha nga ila kining gisusi, didto ilang nakita ang bata nga bag-o lang gipanganak diin nagbitay pa ang pusod nga gilabay daplin sa kanal.
Gidala dayon sa mga sibilyan ang masuso sa Amado Diaz Provincial Foundation Hospital aron susihon ang iyang panglawas.
Maayo na ang kondisyon sa bata nga lalaki, himsog ang panglawas ug anaa karon sa buhatan sa DSWD-Midsayap.
Ang mga molupyo sa Barangay Poblacion 7 ang dunay gidudahan na nga babaye nga maoy naglabay sa iyang bag-ong gihimugso nga anak.
Sa kasamtangan ang kapulisan sa Midsayap ang padayon nga nag-imbestiga aron sa pag-ila sa tinuod nga bansagon sa inahan ug sa posibleng pagpasaka niini og tukmang kaso.