LABING minus unom ngadto sa walo ka mga teams ang interesado ug gituohang moitsa sa ilang hugot nga pagsuporta niining tinguha karon sa pagpahibalik sa commercial basketball league dinhi sa Sugbo.
Sa initial o preliminary meeting nga gipahigayon niadtong Oktubre 28 sa La Fortuna Hotel, pipila ka mga team owners ang wala man tuod makatunga sa panagtagbo apan nagpadala kini sa ilang tagsatagsa ka mga representatives.
Wala pay mga konkretong lagda og guidelines nga gilatid atol sa meeting apan adunay mga proposals ang mga nagpasiugda nga gipangulohan ni Atty. Baldomero Estenzo, ang founder sa Cebu Schools Athletic Foundation, Inc. (Cesafi), kinsa mao usab ang naghulma kaniadto Mandaue Industrial and Commercial Athletic Association (Micaa).
Nasabotan nga ang mga team owners mao nay mo-finalize sa tanang mga lagda o guidelines sa tournament sanglit gihatag ngadto sa mga team owners ang katungod niini sa pagdesider atol na unya sa laing panagtagbo nga ipahigayon sa dili pa matapos ning tuiga o kaha sa sayong bahin sa tuig 2021.
Wa man tuoy klaro kon kanus-a pa gyud matugotan ang pagpahigayon og basketball sa mga lokalidad, apan bintaha na kaayo ni kay sa higayon nga malibkas na ang pag-ban niini ug mobalik na ngadto sa normal ang tanan, sayon ug masugdan gilayon ang mga kalihukan.
Pipila sa mga napanglantawan nga mga teams mao ang ARQ Builders ni Jason Arquizola, San Remegio Beach Club ni Mark Ynoc, Bogo City, Kiboy’s Computer Solutions ni Ricky Verdida ug Fighter Fifty.
Gihatagan usab og imbitasyon ang Britt Catering Services sa Barili ni Mayor Julie Flores, Tubu Master Construction Supply and Services ni businessman/sportsman Rodolfo Borja sa Moalboal.
Tungod sa maayong feed back, daghan pang mga teams nga magrepresentar sa ilang tagsatagsa ka mga lungsod o local government unit (LGU) ang pang imbitahon sa umaabot nga mga adlaw.
Sanglit paghatag man og exposure ngadto sa mga batan-on nga adunay igong abilidad sa natad sa basketball ang katuyoan, gisugyot usab nga kinahanglan adunay age limit sa mga players - 27 years old below - depende sa masabutan.
Apan sa gikaingon ko na, nga ang mga team owners na ang modesider ug mo finalize niini sa ila na unyang panagtagbo.
Atong panghinauton, ubos sa pagbulik sa kadaghanan, mahinayon na kining maong plano kay kapin na sa dekada nga wa na tay commercial basketball league sa Sugbo nga maoy hinungdan sa pagka-awop sa local basketball scene.
* * *
Human sa malampuson nga pagpahigayon sa Omega Sports Promotion sa unang professional boxing sa nasod taliwala ning nagpadayon nga pandemiya, laing boxing stable ang gikatakda nga mosunod sa pagpasundayag karong Nobiyembre 21, 2020.
Ning higayona, turno na usab sa Mindanao-based Sanman Promotion human kini makakuha og permit gikan sa Games and Amusement Board (GAB) ug sa local government.
Giulohan og The Restart, sama sa gihimo sa Omega, dili usab patan-awan sa publiko ang maong event apan posibling ipakita live stream sa Facebook.
Impresibo ang anaa sa ilang card kay ang kanhi world champion nga si Marlon Tapales (33-3, 16KOs) ug Eden Sonsona (36-11-2, 13KOs) man ang magtakos sa main event. Unya moaway sab si two-time world challenger Aston Palicte (26-4, 22KOs) batok ni Reymark Taday alang sa eigth-round bout.
Laing tulo ka mga fights maoy mokompleto sa tibuok card. Michael Casama batok Vergil Degoma; Dave Apolinario batok Bonjun Loperez ug Joey Canoy batok Jovab Lucas. Gikalipay sa chief executive officer (CEO) sa Sanman nga si Jim Claude Manangquil kining maong kalambuan ug mipasalig kini’g mabulokon nga kombati.
Dinhi sa Sugbo, wala pay kompirmasyon sa petsa kon kanus-a sundan sa Omega Sports Promotion ang sunod nilang boxing promotions. Sa sayo pa, ilang gipahibawo nga posibling sa Disyembre kini nila ipahigayon. Atong paabuton. (jun.migallen22@gmail.com)