HUMAN sa malampusong pagpaubos sa libreng swab test sa mga boatmen, vendors ug drivers sa Dakbayan sa Lapu-Lapu, dad-on na usab sa kagamhanan ang libreng swab test sa kabarangayan.

Kini ang gipahibawo ni Lapu-Lapu City Mayor Junard Chan. Katuyoan niini mao ang pagsusi kon kinsa ang duna pay kagaw sa coronavirus disease (Covid-19) aron makasiguro ang kagamhanan, lakip na ang publiko, nga Covid-free ang usa ka dapit.

Usa usab kini sa pamaagi nga matuman ang damgo ni Chan nga mahimong Covid-free ang kinatibuk-ang Dakbayan sa Lapu-Lapu.

Giawhag ni Chan ang mga Oponganon sa pagpresentar sa ilang kaugalingon sa schedule swab test sa ilang barangay.

Magsugod kini sa Nobiyembre 9 sa Barangay Pusok; Nobiyembre 10 sa Marigondon; Nobiyembre 11 sa Gun-ob (kilid sa buwangan); Nobiyembre 12 sa Pajo; Nobiyembre 13 sa Looc; Nobiyembre 16 sa Mactan; Nobiyembre 17 sa Babag; Nobiyembre 18 sa Basak; Nobiyembre 19 sa Bankal; Nobiyembre 23 sa Agus, Nobiyembre 24 sa Calawisan ug Nobiyembre 25 sa Basak.

Bisan gipaubos sa modified general community quarantine (MGCQ) ang dakbayan, giawhag gihapon sa mayor ang publiko sa pag-obserbar sa minimum health standard sama sa pagsul-ob og mask, face shield, kanunayon ang paghugas sa kamot ug pag-obserbar sa physical ug social distancing.