DALAYGON ang gihimo ni Lapu-Lapu City Mayor Ahong Chan sa pagdepensa ug pagtabang sa mga pobreng molupyo.
Ning bag-o gitubag ni Chan ang reklamo sa mga mananagat sa Punta Engaño sa pagpaguba sa pribadong negusyante sa temporaryong pantalan sa pobreng mananagat.
Nakita mismo sa mayor ang nagubang lugar nga gipahimo sa City Government aron sayon sa mga mangingisda ang ilang pagpahiluna.
Gipikhan ni Chan si Jessie Yu, ang mimando sa pagpaguba ug ang nangangkong tag-iya sa property. Ang gobiyerno maoy tag- iya sa dagat o public domain.
Sakto si Chan, ilegal ang estraktura ug pag-abuno sa dagat kay duna may 25 meters easement.
Wa man gukora ni Chan ang negusyante kon dili gibalanse lang niini ang patas nga pagtratar ug di sab apikihon ang mga pobre sama sa mga mananagat.
Gitabangan sab ni Chan ang mga pobreng residente nga wa nay maagian human gisira ang ilang agianan sa usa ka subdivision.
COVID SA BOLJOON
Di angayang ma-alarma ang katawhan sa lungsod sa Boljoon, Cebu sa pagsaka sa nahimong Covid-19 positive nga miabot na ngadto sa 20 human nadugang ang upat.
Atol sa interview sa Agila, gihimakak ni Mayor Merlou Derama ang gipakatap nga estorya sa mga kritiko sa iyang administration nga nahimo siyang Covid-19 positive.
Matud ni Derama, negative ang result sa swab test apil na ang iyang mga staff sa opisina.
Matod niya, siya pa gani ang mida sa Birhen niadtong Miyerkules, subay sa kapistahan sa ilang lungsod karong Biyernes ug Sabado.
Mitumaw ang bag-ong kaso sa Covid ug gipahigayon ang contact tracing dihang na-positibo ang usa ka empleyado sa disaster office, dugang pagpatin-aw ni Derama.
Mihangyo ang mayor ngadto sa mga molupyo sa Boljoon sa pagsunod sa health protocol. Sama sa pagsuot ug mask, face shield ug physical distancing.