BALHOG sa selda sa Sasa Police Station ang tulo ka mga lalaki ug magkamuritsing og mga kaso human madakpi sa Criminal Investigation and Detection Group (CIDG)-Davao City Field Unit (DCFU) atol sa gilusad nga Oplan Paglalansag Omega (Campaign against Loose Firearms).
Ang operasyon natigayon alas 3:15 sa hapon, Nobyembre 10, 2020, didto sa Amethyst St., Damosa, Lanang, Davao City.
Ang operatiba sa CIDG-DCFU nga gipangunahan ni Police Chief Inspector Milgrace Cajes Driz nag-ila sa mga dinakpan nga sila Glin Calimpong Salva, Alan Siega Ortiz ug Glen Siega Japay, pulos hamtong ang pangedaron.
Gilusad ang operasyon sa hiniusang puwersa sa CIDG-DCFU, Davao de Oro Provincial Office ug Sasa Police Station ubos sa Davao City Police Office.
Gikasa ang operasyon gumikan sa report nga nangbaligya og peke nga gold bar ang mga nahisgutan kinsa nagtakin og mga armas.
Dihang nakorner na sila sa kapulisan, narekober sa ilang posisyon ang daghang matang sa tag-as nga armas nga kargado og mga buhing bala ug nakuha sab ang mga cellphone.
Human sa dokumentasyon, giintrigo ngadto sa Sasa PNP ang mga suspek samtang giandam na ang mga kaso nga ipasaka batok kanila didto sa korte.