MAKAPAABOT na unya ang mga Talisaynon nga Globe subscribers sa mas paspas nga internet connection kon mahuman na pagtukod ug operational ang dugang 18 ka cell towers.
Ang katukoran sa mga cell tower giaprobahan na sa Kagamhanan sa Dakbayan sa Talisay.
Wa gibutyag ni Adonis Evangelista, regional sales head sa Globe, atol sa iyang paghatag sa mensahe sa gihimong turnover ceremony sa Miyerkules. Nobiyembre 11, sa 22 ka mga Globe At Home Pre-Paid Wifi nga dunay tulo ka mga buwan nga load ngadto sa Kagamhanan sa Siyudadyan sa Talisay.
Matod ni Evangelista nga gibuhat kini sa Globe aron mapalambo ang ilang signal ug mapahimuslan sa mga Talisaynon labina ning panahon sa coronavirus disease (Covid-19) nga way face-to-face nga klase.
Daghan usab sa mga meeting gipahigayon nga virtual, kasagaran pinaagi sa Zoom app.
Wa mobutyag si Evangelista sa mga dapit diin tukoron ang mga cell tower. Apan si Mayor Gerald Anthony Gullas Jr. niawhag sa Globe sa pagpakigtambayayong sa mga opisyal, labina sa mga barangay diin tukoron ang mga pasilidad aron matabangan nga mapaspas ang pagtrabaho sa mga proyekto.
Nalipay si Gullas sa pagpakita sa Globe og interest nga mapalambo pa ang ilang internet connection taliwa ning mahagiton nga panahon. Si Evangelista niingon nga di lang kay 18 ra ang ilang tukoron kay kon mahimo, ila pa kining padaghanon.
Gawas sa mga pre-paid wifi kit, ang Globe nisaad nga mosuporta sila sa komunikasyon sa Siyudad kalabot sa kampanya batok sa Covid-19. (BBT)