MADUGUONG hitabo ang gisangkoan sa away sa usa ka magtiayon niadtong Martes sa alas 8 pasado sa gabii, Nobiyembre 10, human pusila patay sa usa ka bana ang iyang asawa ug dayon nagpusil usab siya makaduha ka higayon.
Ang asawa namatay diha-diha sa samad pinusilan sa likod sa lawas sa tugkaran sa ilang giabanganmg balay barangay San Isidro, Dakbayan sa Talisay samtang ang bana namatay mga tulo ka oras sulod sa tambalanan.
Selos ang kanunay awayan sa magtiayong Siofiolito, 31, ug Flora Mae “Bambi” Caramat, 30, sa nakalabay nang upat ka mga tuig.
Matod ni Patrolman Eleazar Belcina, imbestigador sa Talisay City Police Station, ilang gituohan nga selos sa bana sa iyang asawa ang motibo.
Giingong nagduda si Siofilito nga dunay laing karelasyon ang iyang asawa hinungdan nga nabuhat ang pagpusil.
“Believed to be nga ang issue nga armas nga 9 mm maoy gigamit sa bana sa pagpusil patay sa iyang asawa ug pagpusil usab sa iyang kaugalingon,” matod ni Belcina.
Sa testimoniya sa usa ka saksi nga si Minerva Corsiga, nagpuyo tupad lang sa balay sa magtiayon, nga mga alas 7 sa Martes sa gabie, niabot si Siofiolito sa ilang balay nga nagsige og singgit.
Giingong namasangil kini sa iyang asawa nga dunay laing lalake.
Ang duha ka mga anak nga babaye sa magtiayon nga nag-edad og 8 ug 9 anyos giingong dali nga gipalakaw sa inahan ngadto sa tupad nga balay.
Wa magdugay, si Corsiga nakadungog og singgit ni Flora Mae kon diin nangayo og pakitabang dungan sa pagpaningkamot nga makasibat sa sulod sa balay.
“Ang atong saksi migawas usab aron unta suwayan nga pugngan ang lalake, ang bana ni Flora Mae, apan nakapadayon gyud sa iyang plano ang bana sa pagpusil sa iyang asawa,” dugang ni Belcina.
Si Flora Mae nahagba pipila ka tikang lang gawas sa ilang balay.
Si Siofiolito mibalik og sulod sa ilang balay ug laing buto sa armas ang ilang nadunggan nga ilang gituohan nga nagpusil usab sa kaugalingon.
Si Flora Mae namatay diha dayon samtang ang bana nadala pa sa tambalanan apan pila ka oras ang milabay, nakabsan sa kinabuhi.
Si Siofolito giingong niadto sa iyang ugangan nga babaye nianang udto ug nangutana kon ang iyang asawa duna bay laing lalake.