GIKUSTODIYA sa Toril Police Station ang duha ka mga lalaki kinsa nakuhaan og mga shabu ug pusil sud sa ilang gisakyan nga multicab sa checkpoint sa Task Force Davao sa Barangay Sirawan, Toril, Davao City alas 9 sa Miyerkules sa gabii, Nobyembre 11, 2020.
Sa report gikan sa Toril police, giila ni station commander Major Michael Uyanguren ang nasikop nga mga suspek nga sila Macky Niño Cahucom Topinio, drayber sa multicab, 31, ug residente sa Iwah, Dumoy, Davao City ug usa ka Shaun Paul Lee Tahil, 27, nagpuyo sa Labaka, Tambacan, Barangay Lizada, Toril, Davao City.
Daghang pakite sa gituohang shabu nga dunay street value nga P40,000, mga pusil ug bala ang nakuha sa posisyon sa duha ka dinakpan, kinsa nagtingkagol karon sa selda sa Toril police nga gikatakdang kasohan sa korte Huwebes. (Jeepy P. Compio)