NANGHIKLING ang 18 ka pamilya human nidahili ang bungtod sa Barangay Sumalili, Arakan, North Cotabato alas 3 sa hapon, Miyerkules, Nobyembre 11, 2020.
Sa taho gikan sa Provincial Disaster Risk Reduction and Management Office (PDRRMO) nga midahili ang kilid nga parte sa dakong bungtod sa maong barangay, hinungdan nga daling nanagan ang mga molupyo paingon sa luwas nga lugar.
Natigayon ang landslide dungan sa makusog nga ulan ug hangin pinisik sa Bagyo Ulysses nga miigo sa Luzon nga bahin sa nasud.
Wala hinuoy nadisgrasya nga mga molupyo sa barangay atol sa hitabo apan di masukod ang gibati nilang kahadlok ug kalisang.
Gisusi sab dayon sa Mines and Geosciences Bureau ug PDRRMO-Cotabato ang dapit nga natigayonan sa landslide.
Nagpasidaan si PDRRMO Officer Engrineer Arnulfo Villaruz sa mga nagpuyo sa Barangay Sumalili nga igmaton ang ilang kaugalingon gumikan "landslide-prone" ang ilang dapit. (Edgar E. Fuerzas)