Ang Cebu City Government pinaagi sa City Legal Office niisyu og show cause order batok sa mga opisyal sa Barangay Lahug, usa ka adlaw human sa mass gathering atol sa grandeng pagbukas diin nag sale ang usa ka tindahan sa mga sapatos sa ilang barangay.
Sa gawas sa JS Footwear naglinya ang bagang duot sa mamalitay, ang uban alas 4 pa lang sa kaadlawon milinya nangyawat makapalit og tulo ka paresan sa mga sapatos sa presyong P998.
Gipahibawo ni City Attorney Rey Gealon, kinsa nipatawag sa Committee of Three, ang inisyal nga imbestigasyon nga gipahigayon.
Ilang nahibaw-an nga nakahibawo ang barangay officials labot sa sale, apan napakyas pagkontrolar sa bul-og sa mga tawo.
Sila si Kapitan Hazel Ann Muaña-Empleo, kagawad Ronnie Sanchez, Ramie Borromeo ug Romeo Borden gipatubag sulod sa 24 oras inig human nila og dawat niini.
Ang gipasabot ni Gealon mao ang paglapas sa Executive Order number 094 ni Mayor Edgardo Labella nga nagdili sa mass gathering.
Ilang gitugotan ang private commercial establishment pagpahigayon og sale nga wa motuman sa minimum health protocol ilawom sa lagda sa Inter Agency Task Force.
Ikaduha mao ang pagtugot sa maong establisemento nga way business permit ug ikatulo ang pagtugot nga makapahigayon sila og sale nga walay pagtugot sa barangay.
Si Empleo niangkon sa interbyu sa SunStar Cebu nga nananghid kaniya ang management hinungdan nga ilang giinspeksyon niadtong Nobiyembre 10.
CCPO mokiha
Pasakaan og kaso sa Cebu City Police Office ang tag-iya sa JS Footwear tungod sa giingong wa pagpatuman sa minimum health standard.
Gibutyag sa hepe sa kapulisan sa siyudad sa Sugbo, Police ColoneL Josefino Ligan, nga nakalapas sa Article 151 kun disobedience nga may kalambigitan sa executive order sa mayor. /PAC, AYB