Usa ka suspek nga mamumuno ang nagpaupaw human niya gipusil-patay ang kanhi barangay konsehal sa Mantalongon, lungsod sa Barili niadtong Miyerkules, Nobiyembre 11, sa alas 10:20 gabii sulod sa merkado sa barangay.
Si Porferio Reyes Jr., 52, biyudo ug kanhi konsehal sa Brgy. Balao, Barili, patay human nakaangkon og daghang samad pinusilan sa iyang kalawasan.
Bisan kung wala nay buhok si Jay Lito Bendanillo, 41, ang anak ni Reyes nakaila gihapon kang Bendanillo, usa ka lab-asero ug taga Brgy. Boloc-boloc, Barili. Nadakpan si Bendanillo sa follow-up operation sa kapulisan alas 9:00 sa buntag sa Huwebes, Nobiyembre 12, sa Brgy. Candabong, lungsod sa Dumanjug.
Si Police Staff Sgt. Jeffrey Alpas sa Barili Police Station nga nahinabi sa Superbalita Cebu nagkanayon nga matag Huwebes ang tabo sa Mantalongon.
Si Reyes, uban sa iyang mga sakop sa pamilya, kaabag niini sayo nga mipwesto alang sa pagpamaligya og larang.
Matod pa si Reyes naghiwa og isda nga ilang lutuon.
Nibutho ang usa ka lalake ug nibunot og armas, nipusil ngadto ni Reyes makadaghan, dayon nisibat sakay sa motorsiklo.
Si Captain Romeo Caacoy Jr., hepe sa Barili Police Station nga nahinabi sa Superbalita Cebu, nagkanayon nga si Bendanillo positibong giila sa anak ni Reyes nga maoy nipusil.
Nailhan niya si Bendanillo kay wala kini magtabon sa nawong.
Gibutyag sab sa anak nga si Bendanillo nasuko sa iyang amahan.
Tungod niini, dali nila gipangita si Bendanillo, kinsa naabtan nila didto na sa Dumanjug, nanuroy sa baligyang isda.
Gipahibalo nila sa iyang kalambigitan sa pagpatay ni Reyes.
Ilang gipusasan si Bendanillo kinsa hugtanong nanghimakak sa pasangil bisan pa man positibong gitudlo sa anak ni Reyes.
“Selos ang motibo sa krimen. Nasayran sa kapulisan nga nagduda ang suspek ang biktima ug ang iyang asawa dunay relasyon,” dugang ni Captain Caacoy.
Si Reyes gisuwayan na kini sa pagpatay ni Bendanillo niadtong 2019 sa Dakbayan sa Sugbo.
Si Reyes nag-atiman sab sa iyang tindahan sa Brgy. Bulacao Pardo, Cebu City, ug gidunggab ni Bendanillo pero wala naigo.
Na-blotter ang panghitabo sa barangay apan si Reyes wala nipadayon sa pagpasaka og kaso.
Sumala ni Captain Caacoy, ang asawa ni Bendanillo gikatahong kanhi nagtrabaho sa tindahan ni Reyes.
Dihang gipangutana sa pulis kabahin sa krimen, nanghimakak si Bendanillo ingon man nipadayag nga wala siya makaila ni Reyes. / GPL