Magpadayon ang transaksiyon sa Minglanilla Police Station bisan temporaryo una nga gipasirado nunot sa nagpositibo sa Covid-19 ang hepe.
Matod ni Police Colonel Aladdin Collado, direktor sa Cebu Provincial Police Office (CPPO), nga wala gi-lockdown ang estasyon kondi temporaryo una nga iyang gipasira sa kasamtangan samtang gipaubos pa sa pag-swab test ang tanang mga sakop nga pulis niini apil na ang non-uniformed police.
Dugang ni Collado nga samtang wala pay resulta sa swab test ang tanang pulis sa Minglanilla anaa una magpundo sa sulod sa maong estasyon ug walay gitugtan nga mogawas.
“Actually yung hepe lang naman ang nag-positive. Ang ating mga pulis naka-undergo na nang swab test. As a proactive approach natin, we put into quarantine yong lahat nang pulis natin sa Minglanilla,” matod ni Collado.
Matod ni Collado nga samtang naka-quarantine ang tanang pulis sa Minglanilla, dunay mga pulis gikan sa Police Regional Office (PRO) 7 una ang gidugang aron mohimo sa pang adlaw-adlaw nga trabaho sa kapulisan. Buot pasabot niini padayon guihapon ang transaksiyon sa pulis matag adlaw.
Si Collado nibisita sa Minglanila Police Station Huwebes, Nobiyembre 12, aron masiguro ang iyang mga sakop nga anaa sa maayong pagkabutang.
Samtang ang hepe gibutang na karon sa isolation facility ug gi-monitor bisan paman nga hinayhinay na nga nakarekober. / BBT