Barrita: Pagbalhin sa Kapitolyo sa Balamban

Gigahinan sa kagamhanan sa lalawigan sa Sugbo og P550 milyones sa giproponer nga 2021 budget alang sa pagtukod sa usa ka Cebu Provincial Government Center (CPGC) didto sa lungsod sa Balamban sa kasadpang bahin sa isla sa Sugbo. Matod pa ni Cebu Gov. Gwendolyn Garcia, kon mahuman na ang CPGC, adto na mag-opisina ang executive ug legislative departments sa probinsya. Sa laktod, ibalhin ang Kapitolyo didto sa Balamban, usa ka first class municipality nga gitaliwad-an sa lungsod sa Asturias sa amihanan ug syudad sa Toledo sa habagatan. Gipaabot nga ang mga kawani sa Kapitolyo mobalhin sab sa pagpuyo didto sa Balamban, matod pa sa gobernador. Adunay housing component sa mga kawani sa Kapitolyo ang CPGC, matod niya. Ug kadtong taga probinsya ang hatagan og priority sa pag-hire og kawani sa Kapitolyo.

Kon madayon ang pagbalhin sa Kapitolyo ngadto sa Balamban, hayan nga mas madali ang pagkahimo sa maong lungsod nga usa ka syudad. Gipaabot nga mosaka ang populasyon niini nga 90,000 ug mas molambo ang negosyo ug ekonomiya sa maong lungsod. Ang Balamban naila nga maoy shipbuilding capital sa Pilipinas, pabrika sa dagkong mga barko. Ang West Cebu Industrial Park, usa ka 283 ektaryang industrial estate, adunay onse ka mga locators ug kapin sa 14,000 ka mga trabahante. Sa usa lang ka master stroke sa gobernador, maluagan og dyutay ang naghuot na nga syudad sa Sugbo, samtang molambo ang usa ka lungsod sa kasadpang bahin sa lalawigan sa Sugbo.

Unsay mahitabo sa karaang Kapitolyo dinhi sa syudad sa Sugbo? Si Guv Gwen miingon nga ang 82 anyos na nga Cebu Provincial Capitol building mahimong usa ka mixed-use development nga maglakip sa usa ka public museum. Sa ato pa di gub-on ug bungkagon ang karaang Kapitolyo nga natukod niadtong 1938 ug gideklarar nga usa ka national historical landmark sa National Historical Commission of the Philippines (NHCP) niadtong 2008. Plano pa hinuon ang pagbalhin sa Kapitolyo ngadto sa Balamban. Angay nga konsiderahan ang convenience sa mga tawo nga dunay tuyo sa Kapitolyo nga naanad na nga moanhi sa syudad sa Sugbo. Di kaha sila maglisod kon ang Kapitolyo tuyuon?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph