Si Cebu City Mayor Edgardo Labella mipagawas na og Executive Order (EO) No.104 nga nagdili sa pagpanaygon sa mga sakyanan, kadalanan ug kabalayan. Samtang ang ubang mga local government unit (LGUs) ug ang Inter-Agency Task Force wala pa mosagop sa maong desisyon. Nasayod naman kita nga basta mag-singabot na gani ang Pasko, mauso na gyud ning nga panaygon sa pipila nato ka kaigsuonan. Ang uban gihimong fund-raising samtang ang uban gihimong panguwarta na gyud labi na tong walay tarung pangita.
Ang pagdili sa panaygon gumikan gihapon sa Covid 19 kay magtapok man ang mga tawo kon manaygon bisan diha sa kalsada lang. Ang uban nga mag-grupo mosulod man gyud gani sa mga panimalay og adto didto manganta. Dilikado gihapon sa takod sa Covid 19. Misupak ang uban kay tradisyon kuno. Tradisyon? Daghan na sa atong mga tradisyon ang napadaplin gumikan ning atong gikahadlukan nga balatian.
Sa katapusang survey sa Social Weather Station (SWS), 77% sa mga Pilipino nagpa-abot og usa ka maayo o malipayong Pasko karong tuiga. Matod sa mga sociologists naa na sa atong kinaiya sa pagka-Pinoy ang pagka-malaumon o optimistic kanunay.
Ug ang Pasko mao ang usa sa naghatag kanatog paglaum kanunay.
Sa tibuok tuig ang mga Pilipino kanunay nga nagpangita sa gitawag og good things in life ug labi na gyud kon maghinapos na ang tuig. Alang kanato mabungahon ang tibuok tuig ilabi na ug makaselebrar kita sa Pasko sa tumang kamaya ug kamadasigon.
Apan lahi karong tuiga gumikan kay mihasmag man kanato ang Covid 19, usa ka mapintas nga balatian nga way gi-ila, kabus man o ma-adunahan.
Hinungdan nga atong ipahaum ang atong pagsadya sa Pasko uban ang tumang panagana ug pagpaniguro nga dili na mobalik pagsaka ang tinakdanay sa maong balatian.
Kay wala nay nakalabaw sa kaayo sa kalipay nga mabatunan nato sa Pasko kon pabilin pa nga naginhawa kita ug ang atong pamilya. (bobbygnalzaro@gmail.com)