Naglayat-layat na sab ko sa TV5, GMA 7 ug A2Z adtong Dominggo ug akong gisuwayan kon asa mo-ungot ang akong atensyon.
Way appeal nako ang mga komedya ug drama-drama sa GMA 7.
Hmmm, oki ra ang mga kanta-kanta sa A2Z pero ang mga sayaw ug mga kanta sa mga batan-ong artista sa TV5 nakapa-ungot nakog dugay sa maong channel.
Sa niaging 11.11 sale, naka-order gyud kog ahat og air purifier necklace kay nibarato og gamay.
Kini bisan pag kaduha na ko nabiktima aning online, online chuchu...una mao ang plastic nga lingkuranan sa bisekleta nga humok kaayo tan-awon sa video pero pwerte diayng gahi-a.
Sa gitawag nga ice underwear, nabiktima pod ko kay imbes siyam ka buok ang pagarpar ug hasta sa label sa putos, unom ra gyud ang sulod.
Sa niaging weekend, nataymingan nako si Rayver Cruz ug Christian Bautista sa usa ka production number sa “The Clash” diin host si Rayver ug judge si Christian.
Nakugang ko kay nakigtigi si Rayver kang Christian sa pagkanta samtang si Christian wa sab pabitin kang Rayver sa sinayaway. Nindot.
Millenial horror queen na diay si Kim Chiu nga makita sa proyekto nga “U-Turn.”
Ang titulong horror queen gigunitan niadto ni Kris Aquino tungod sa iyang mga proyekto nga pulos makalimbayot sa balhibo tungod sa kahadlok.
Aron tingali way gubot, gibutangan og ‘millenial’ ang titulo ni Kim. Brayt!
Parehas kanindot ang tingog ni Vice Gov. Imelda Papin kon mosulti ug mokanta. Na-interbyu kini ni Gorgy Rula ug Morly Alinio sa programang “Syobis Talk Ganern” sa dzRH bahin sa kahimtang sa Camarines Sur tungod sa bagyong Ulysses.
Naunsa ba sab ning mga bagyo nga nagsunodsunod man gikan ni Quinta, Rolly, Siony (naa pa ba toy Tonyo?) ug karon Ulysses. Klaro gyud nga wa silay social distancing. Ahak!
Karong Nob. 29 (Dominggo) na diay ang pagpili sa Ms. Earth 2020.
Makita kini sa TV5 sa alas 10 sa gabii.
Molusot kaha ang kandidata sa Pilipinas aron madugangan pa ang korona nga natigom sa mga Pinay sa nilabayng katuigan? Atong atangan.
Artista kaha ang mga ginikanan ning usa ka batang babaye nga endorser sa usa ka snack brand? Gwapa ang bata ug maayo kaayo sa iyang gibuhat.
Parehas ang epekto ning maong commercial ngari nako sa kanhi proyekto ni Zia nga anak ni Dingdong Dantes ug Marian Rivera adtong bata pa kaayo kini ug nag-endorso og milk brand.