Handumon ta ang kagahapon sa Monte Alto

Bisan og naa na ta sa modernong panahon pero naay usa ka suroyanan sa probinsiya sa Leyte nga kon kamo makahigayon og suroy susama ang ambience nga mibalik sa karaang panahon.

Kini ang Monte Alto Eco Resort Villas nahimutang sa Barangay Suba sa lungsod sa Villaba, Leyte nga dili ra layo sa town proper ug sudlunon kini gamay gikan sa highway.

Ang Monte Alto Eco Resort Villas gipanag-iya sa pamilyang Larrazabal sa Villaba. Tungod kay dunay talagsaon nga kanindot ang lugar, nisugyot ang ilang mga higala nga buksan alang sa publiko sa tuyo nga mapaghiayon ang katahom sa mga karaang butang ug ang kinabuhi kaniadto mga nangaging katuigan.

PANDEMIC NAKA-INGON

“Lingaw-lingaw lang ni nako nga na-turn into business bah, so mao na siya,” matod pa ni Andrea Larrazabal-Tan, wedding planner/coordinator anak sa tag-iya sa Monte Alto.

Ang Monte Alto Eco Rosert Villas usa ka bed and breakfast accommodation, coffee shop ug restaurant.

Gisugdan pagpanindot ang Monte Alto pagsugod sa Covid-19 pandemic sa dihang ang uban nilang negosyo nasira.

Matod pa ni Larrazabal nga wa pay duha ka buwan ang maong establishment apan positibo ang reaksiyon gikan sa publiko, ilabi na niadtong mo-dine in.

Apan ang kadtong nagplano nga mocheck-in alang sa overnight stay nga sagad maoy i—inquire sa mga guest ang kasamtangan under construction pa ang Villas sa pagkakaron.

Una ikapasigarbo sa maong establisemento ang ilang mga karaan nga disenyo sa maong balay dili lang sa exterior apan hilabi na ang interior nga bahin niini. Tug-an ni Larrazabal dili siya ancestral house apan ang mga dapat o materyales nga gigamit gikan sa mga ginuba nga karaan balay nga maoy ilang gita-od.

“It’s a 15-year-old house. Since akong mga igsuon naminyo na wa na mi diha namuyo mao to ang mga rooms na vacant,” tipik sa pamahayag ni Andrea nga nahinabi ning tigsuwat.

MGA GITANYAG

Daw karaan apan dekalidad nga furniture, ubang gamit ug dekorasyon nga makita niadtong panimalay sa karaang panahon; sama sa mga banga, kaban, gamit sa kan-anan ilabi na ang porselana nga dining wares ug uban pa.

Gawas nga malingaw ang imong mga mata sa mga karaan nga gamit mamahimo sab ka mag-relax kay naa silay kawa bath, flower bath ug bubble bath ingon man spa o massage.