WA MAKAPANAGANG sa gikalisangang sakit nga coronavirus disease (Covid-19) ang tricycle driver sa Siyudad sa Tagum, Davao del Norte human mataptan sa kagaw.
Subay sa opisyal Facebook page sa Davao Regional Medical Center (DRMC), nasayran nga ang pasyente nag-edad og 59-anyos, nakasinati og ubo ug kalintura. Sa dihang gipailawom sa test, nagpositibo sa novel coronavirus.
Nalakip ang pasyente sa laing upat pa ka bag-ong kaso sa Covid-19 sa probinsiya nga gilangkuban sa 51-anyos nga babaye nga taga lungsod sa Carmen nga dunay nasinati nga ubo ug naglisud pagginhawa; healthcare worker nga nag-edad og 46-anyos nga sumala pa na-exposed sa pasyente nga positibo sa sakit; 49-anyos nga lalaki nga molupyo sa siyudad sa Tagum nga na-exposed gihapon sa pasyente; ug ang 57-anyos nga lalaki nga gikan sa Agusan del Sur nga gi-refer sa DRMC gumikan kay naglisud pagginhawa.
Sumala pa nga ang maong mga pasyente hugtanong ginabantayan ang kahimtang sulod sa isolation facility.
Dugang gibutyag nga ning kasamtangan, ang Davao Regional Medical Center dunay kinatibuk-ang 82 ka mga pasyente nga na-admit tungod sa Covid-19.
Sa pikas bahin, sukad nga naplastar ang Covid-19 Testing Center sa DRMC, nakahimo na kini pagsusi og 6,298 samples sukad niadtong Mayo 30, 2020, diin mga specimens nagagikan sa Davao del Norte, Davao De Oro, Davao Oriental ug Caraga Region. (Dexter T. Visitacion)