NAKAPIYANSA na ang magsisibya sa kasong giatubang didto sa Davao del Sur Provincial Prosecutor's Office pipila ka oras human siya gidakop sa mga sakop sa Criminal Investigation and Detection Group (CIDG) sa Davao del Sur alang sa temporaryo niyang kagawasan.
Gidakop sa mga sakop sa CIDG-Davao del Sur si Junior Ortiz Digamon, alas 12:30 sa udto, Biyernes, Nobiyembre 13, 2020.
Si Digamon gihulagway nga nag-atubang og kasong cyberlibel subay sa orden de aresto nga gipagawas sa Regional Trial Court (RTC) Branch 18 nga gilagdaan ni Presiding Judge Marivic Trabajo-Daray niadtong Oktubre 23.
Gihulagway sa mga awtoridad nga nahitabo ang "Oplan Pagtugis" sa istasyon mismo sa Brigada News Davao sa McArthur Highway, Ulas, Barangay Talomo Proper, Siyudad sa Davao.
Mga sakop sa CIDG-Davao del Sur, ilawom ni Major Edgardo Bahan, maoy nisilbi sa orden de aresto batok kang Digamon, kauban ang uban pang yunit sa kapulisan.
Ang korte nagtakda og piyansa nga P10,000 sa kaso nga giatubang ni Digamon alang sa iyang temporaryong kagawasan.
Gikustodiya sa kapulisan ang magsisibya alang sa dokumentasyon sa giatubang nga kaso ug human niini nipiyansa siya.
Hangtud Biyernes sa hapon, wa pa masayri kon kinsa ang mipasaka og kaso kang Digamon nga giilang beteranong komentarista sa radyo ug sa social media sa Siyudad sa Davao.