DAGHAN ang mipabuhagay nga netizens sa ilang panglantaw labot niining giduso nga ordinansa karon sa Davao City nga bawal mag-videoke.
Giduso ni First District Councilor Jessica Bonguyan ang maong sugyot nga ordinansa diin pahamtangan og silot ang kinsa mang magsiyaok-siyaok og kinanta sa videoke bisan adlaw’ng dako. Mokabat sa P5,000 ang multa kung madakpan ug mamahimong mapriso.
Nagtumong kini nga di madistorbo ang nag-study sa ilang modules o nag-online class nga mga estudyante.
Subay sa ordinansa, gisugyot nga gidili ang videoke gikan alas siyete sa buntag ngadto alas singko sa hapon, Lunes ngadto sa Biyernes diin walay apil dinhi ang weekends ug holidays. Makakurat ang multa. Sa unang higayon, P1,000, sa ikaduha, P3,000, sa ikatulo, P5,000 ug posible nga mapriso.
Maayo ang tumong sa ordinansa, apan makuhaan og katungod sa kagawasan ang katawhan mga anaa lang nag-istambay sa sud sa balay gumikan sa pandemya.
Naa lang gayod na sa estudyante ug sa mga ginikanan ang paghan-ay sa mga gimbuhaton sa pagtungha sa online.
Mas maayong estudyohan sa unta kini sa mga konsehal una pa mahingpit nga mamahimong usa ka ordinansa kay basin unya daghan ang nagsakit ang buot nga katawhan.