Nibiya na sa Cebu City paingon sa lalawigan sa Catanduanes ang 60-man team sa Cebu City Government sakay sa barko sa Philippine Navy dala ang mga hinabang kinsa motabang sa paghawan ug limpyo sa ilang lugar nga grabeng naapektohan sa bagyong Rolly, Nobyembre 13, 2020.
Si Mayor Edgardo Labella maoy nangulo sa send off ceremony sa Naval Forces Central kauban ni Commodore Dorbin Jose Legaspi kinsa nipagamit sa ilang BRP Batak 299 nga gikarakdang maabot karong buntag, Nobiyembre14, human sa 24 oras nga biyahe.
Ang mayor niingon nga gawas sa P5 milyones nga tseke isip financial assistance nga bitbit ni Konsehal Dave Tumulak, nagdala usab sila og 500 ka sakong bugas humay (50 kilos each), 5,100 bottled iced tea ug 850 ka botelyang tubig (1.5 liter matag usa) para sa mga tawo sa Catanduanes.
Si Labella dako og salig sa 60-man team nga gipangulohan ni Tumulak ug DSWS chief Frances Abangan sanglit ang maong grupo mao sab ang gipadala didto a Leyte ug Mindnao dihang nipadala usab og ayuda ug clearing team ang City Government.
Ang mayor nagpasalamat sa konseho gumikan sa pag-aprub sa P5 milyones isip hinabang ngadtonsa Catanduanes kinsa maoy labing nanginahanglan ug labing lisod sudlon sa mga ekipo nga magdala og ayuda.
Si Labella naghunahuna na nga motabang sa siyudad sa Marikina ug lalawigan sa Rizal sanglit sila usab ang grabeng naapektohan sa bagyong Ulysses.
Apan si Labella nagkanayon nga nakasinati og kakuwangan sa pundo ang Cebu City gumikan sa pandemya ug hinay usab ang koleksyon sa buhis. / PAC