Siyam ka mga panimalay ang naugdaw sa sunog kagahapon, Nobiyembre 13, sa Sityo Fatima sa Barangay Pahina Central, Dakbayan sa Sugbo, sa likod sa bag-ong gitukod nga edipisyo sa Cebu City Medical Center (CCMC).
Matod ni FO2 Emerson Arceo sa Cebu City Fire Department, niulbo nga sunog alas 2:03 sa hapon ug nakontrol kini alas 2:32 sa hapon.
Matod ni Arceo, naglisod sila gamay sa pagpadagan sa tubig tungod dili makasulod ang mga fire truck ug kutob lang sa gym nga tupad sa barangay hall. Ang hose na lang ang ilang gisumpay aron makapadagan dayon og tubig sa dapit sa nasunogan.
Alas 2:55 na sa hapon nadeklara nga wala nay angay kabalak-an. Nagsugod ang sunog sa panimalay ni Rose Gonzales. Ang sunog dali mikatap ug napagan ang lain pang walo ka mga panimalay, matod ni Arceo.
Matod ni Arceo, moabot sa P350,000 ang danyos sa sunog.
Samtang duha ang gitubag sa mga medical personnel nga naka-standby sa pag-ulbo sa kayo. Si Charita Misa, 55, naglisod og ginhawa samtang si Theresa Gonzales nakaangkon og paso. / BBT