Mobalor og P12 milyones nga shabu ang gisunog sa Philippine Drug Enforcement Agency (PDEA) 7 ug PNP sa crematorium sa Cosmopolitan Funeral Homes kagahapon sa buntag, Nobiyembre 13, 2020.
Ang illegal drugs aduna nay desisyon sa korte nga angayan nang gub-on.
Ang gipangsunog naglangkob kini sa usa ka kilo nga shabu nga nagbalor P6.8 milyones, 21 kilos nga dahon sa marijuana ug mga kapsula sa ecstasy lakip na ang mga expired nga regulatory drugs nga nasakmit sa PDEA-7 ug sa kapulisan sa Central Visayas.
Matod ni Levi Ortiz, hepe sa PDEA 7, kabahin kini sa mando ni President Rodrigo Duterte nga gub-on na ang mga ebidensya nga illegal drugs nga naa sa ilang kustodiya ug nahukman na usab sa korte.
Aduna pay mosunod nga sunugon nga kinilong shabu nga naa sa ilang evidence room lakip na sa PNP crime laboratory.
Ang kagamhanan sa Dakbayan sa Sugbo misaad nga mogahin og pundo aron mopalit og crematorium chamber aron anhi sunogon ang mga ebidensya nga illegal drugs.
Si Konsehal James Cuenco, pinasidunggang dinapit sa PDEA-7, nipadayag og suporta sa plano nga crematorium. / AYB, BBT