DUNAY bag-ong 59 ka mga kaso sa coronavirus disease (Covid-19) sa Nobiyembre 14, sa Dakbayan sa Sugbo, labing taas ning buwana.
Si Konsehal Joel Garganera, deputy chief implementer sa Emergency Operations Center (ECO) niingon nga mao na kini ang iyang gikahadlukan nga mosaka ang mga kaso sa Covid-19 sa siyudad.
“That was the warning. That was what I feared. But I assure the public that everything is in control. But palihug kooperar lang ta. Please kooperar lang ta. Tomorrow we will be meeting with the police,” matod ni Garganera sa interview sa Superbalita Cebu.
Tungod niini, si Mayor Edgardo Labella mopaestrikto og balik sa border control, ibalik ang number coding sa quarantine pass ug estriktuhon ang screening sa mga locally stranded individual (SLI).
Gilusad niadtong Biyernes sa gabii, Nobiyembre 13 hangtod sa Sabado sa kaadlawon, Nobiyembre 14, ang Oplan Bulabog tungod sa misakang mga kaso sa Covid-19 ning nakalabay nga mga adlaw.
“I will reimplement the quarantine pass' number coding. I will have stricter border control. I will regulate the entry of LSIs to ensure that they are really LSIs and not just here for leisure. Only APORs and workers with valid IDs and employment certificates proving they are working in the city will be allowed enrty,” nagkanayon si Labella.
Uyon si Garganera sa mao nga mga lakang ug nagpaabot siya nga si Labella moluwat og executive order.
Wa pa hinuon masayod si Garganera kon pila ka swab samples ang gigikanan sa mao nga mga kaso, apan sumala sa iyang nahibaw-an gatusan ang ilang nakuha kay ila nang giapil bisan ang second generation contacts nga iyang gihulagway nga “massive testing” na.
Gibutyag usab ni Garganera nga ang 59 ka mga pasyente nagagikan sa 23 ka mga barangay sa Dakbayan sa Sugbo.
Sa mao nga mga pasyente, 30 ang mga lalake ug 29 ang mga babaye. Upat sa 59, naglangkob sa mga bata sa orphanage, nagpanuigon og 1, 2, 4 ug 6.
Ang orphanage ila nang gi-lockdown, apan wa siya motug-an sa ngan sa balay sagupanan.
Ang balay usab sa unom ka mga pasyente ila nang gipang-lockdown.
Pito sa mga pasyente naa sa mga ospital sa siyudad sa Sugbo gipangdala, pribado ug pampubliko.
Sa Dominggo, Nobiyembre 15 sugod sa sayo sa buntag, ilang pangdad-on ang 52 sa New Normal Oasis for Adaptation and a Home (Noah) sa South Road Properties human siya makigsulti sa pangu niini, manlalaban Joy Pesquera ug Konsehal Dondon Hontiveros.
Nag-andam na sila og unom ngadto sa pito ka mga ambulansya.
Ila usab nga paspasan ang ang pagsubay sa 42 pa ka mga pasyente pinaagi sa contact tracing ug iyang gilauman nga sa alas 3 sa hapon mahuman na sila sa ilang pagsubay alang sa isolation.
Sa hapon, magtagbo sila sa EOC uban sa kapulisan aron mahisgutan ang pagbalik sa paghugot sa mga lakang sa pagpatuman sa mga lagda sa health protocol. (MVG, REV)